立場新聞 Stand News

符合現代價值觀的中文/中史科

2017/12/31 — 19:13

圖片來源:網絡片段截圖

圖片來源:網絡片段截圖

近年香港年輕人經常被中老年人指價值觀和精神修養出問題,矛頭均指被教育界教壞,沒有教好中國文化和歷史。筆者深感認同。學校教的實在太不符合當下的香港社會了。

例如,明明年輕人不應該關心政治,學校卻推崇「先天下之憂而憂」;明明人生目標應該只有上位和發達,卻推崇「淡薄名利」;明明應該睇錢份上老闆講乜都照做,卻推崇「不為五斗米折腰」;明明應該積極支持政府,英治時就效忠英女王、民國時就支持國民黨、中共得勢時就聽中共話、日本仔打到來時就做漢奸,卻推崇「忠臣不侍二主」;明明應該為生計乜都做得、祠堂和老婆仔女都賣得,卻教人「孔曰成仁孟曰取義」。

因此,筆者認為我們有必須改變關於以下歷史人物的教授內容,以符合中環核心價值、獅子山下精神、著名人事顧問的角度和價值觀,並且盡早在新一年開始在學校教授:

廣告

伯夷、叔齊
>> 寧願餓死山頭都唔肯搵新工,廢青之霸

諸葛亮
>> 幾廿歲人都唔搵工,賺錢養家推比阿哥做,家頭細務推比細佬做,一日到黑響度睇書、吹水、旅行,典型廢青
>> 有客到都唔幫手招乎,仲訓晏覺,老母響度實鬧到佢死仔包
>> 有Big4(袁曹表璋)唔做,偏要走去間搵朝唔得晚,老細成日漏夜走佬(丟低老婆仔女果隻)的細公司做
>> 搵到工之後都仲強調自己唔想發達唔想出名(不求聞達於諸侯),都唔知咩人黎
>> 最後過勞死,屬個人身體管理失敗,肯肯定係平日生活太舒服唔kum捱

廣告

嵇康
>> 有工唔返,掛住吹水,偏偏中意諷刺時弊,最後惹來殺身之禍,抵X死,你唔刺激中央又點會殺你頭

陶淵明
>> 唔中意老細就辭職唔撈,工作態度欠佳,缺乏獅子山下精神,自我意識過盛,典型廢青

魏徵
>> 專門頂撞老細,尊卑不分,需重新學習正確打工仔態度

陸秀夫
>> 公司倒閉唔肯搵新工,仲要走去跳海。自殺,乃廢青證明,顯示其人唔捱得,缺乏獅子山下精神

文天祥
>> 寧願殺頭都唔肯轉公司,唔知咩人黎,東家唔打打西家咁簡單道理都唔識

徐霞客
>> 成日掛住旅行,廢青象徵之一

袁崇煥
>> 粗口爛舌,十足吸了毒的大學生,一定要報警同向佢校長寫信投訴

孫文
>> 讀大學時中意討論政治,又係典型廢青象徵
>> 讀完醫又唔去搵真銀,真係蠢過隻豬
>> 勾結外國勢力、意圖顛覆國家政權、做盡各種違法違憲之事,鐵證如山
>> 揸外國護照,去左外國避難都好,你首先是中國人,終有一日要坐洗頭艇
>> 仲要成日昆人落搭捐錢眾籌

蔡元培
>> 製造大量現代廢青的罪魁禍首。學生犯法、反政府、發夢搞革命,不但不報警拉晒佢地,反而縱容、包庇、護短、抗議政府拉人,簡直是千古罪人

何鳳山
>> 唔聽老細話自作主張,屬失敗的公務員。應該上頭叫你推洗腦教育就推、搞一地兩檢就搞、喊李飛九千歲就喊、DQ議員就DQ,才是正確的公務員態度

趙括
>> 可以靠把口搵食,是個不可多得的青年才俊,適合做KOL、打手、財演、經紀佬、風水佬、神棍、建制派等多種職業,生在現代香港必定如魚得水

趙高
>> 閹人、指鹿為馬,實乃建制派之祖師爺,香港社會精英賢達之榜樣

張松
>> 邊間公司大就跳槽去邊度,仲送埋攻略本,真是人才

華歆
>> 擅長揣摩上意,猜度中央想點,曹丕未開口就逼獻帝簽下禪讓的合約書,屬建制派重點學習對象

來俊臣
>> 擅長嚴刑峻罰,適合做律政司司長、高院法官等

馮道
>> 老闆要乜做乜,換幾多次老闆都冇問題,適合做AO、建制派、亞視高層等

秦檜
>> 專長為投降、求和、割地、內鬥、篤背脊、妨礙抵抗運動,無論建制定民主派都岩做

賈似道
>> 專長認叻、攀關係、偽造業績、虛報軍情、煽動人心、貪污腐敗等等,非常適合做特首或金融會計界

和珅
>> 專長為外交和貪污,史上最適合做一帶一路超級聯繫人之人

葉名琛
>> 不戰不和不守、不死不降不走,一般香港人的寫照也

張景惠
>> 歷侍清政府、北洋政府、國民政府、偽滿州國等,非常靈活變通,而且跳槽後繼續升職加薪,屬識時務者魏俊傑,打工仔榜樣

郭沫若
>> 擅長拍馬屁的文膽,適合做左報作家、左校校長、大台清談節目主持等發揮所長

宋靄齡
>> 俗語說宋家三姊妹一個愛錢一個愛國一個愛權,當然是愛錢最醒目,最後還去了美國,更見其眼光正確

 

作者博客

發表意見