立場新聞 Stand News

簡體字要識,但唔駛學

2016/2/15 — 10:23

雖然,有時我都會恥笑簡體字嘅造字章法九唔搭八,實則我對簡體字冇偏見,攞起本大陸書一樣照睇。我唔會笑簡體字係文盲用嘅,因為大陸好多知識分子、文學家以至諾貝爾文學獎得主,都係用簡體字寫作。劉曉波、張祖樺等人嘅零八憲章咁正義,都冇得唔用簡體字。中共為掃盲而草創簡體字,有佢嘅歷史因果,唔到我理咁多。但香港開埠以來都用繁體字廣東話,教育局突然開倒車,要全港學生學簡體字,用普通話辭彙,咁就係盲從。中共最新、最迫切嘅掃盲任務,應該係掃香港教育局。

教育局咁講:「學生在掌握繁體字後,亦應具備認讀簡化字的能力,以擴大學生的閱讀面,及加強與內地、海外各地的溝通。」

呢番好意,多謝夾盛惠。既然識得講要掌握繁體字先,唔該唔好搞咁多野,一切中文課程照舊用繁體字廣東話。要識簡體字,到時自然會識,唔駛強廹教學咁野蠻。

廣告

我自己嘅經驗就係咁。當年喺港大讀中文中史,有啲參考書係簡體字,成班同學都係要買本《简化字总表检字》,花費五毫子,不出一兩個月,睇大陸書全無難度,邊有話特登改用簡體字教學咁無聊?而家我亦有唔少「內地、海外各地」嘅朋友,溝通得唔知幾好。繁體字廣東話教學有乜野問題?

廣告

就算教育局真係咁有善意,都唔駛勞師動眾。最簡單嘅方法,就係中小學生每人派本《简化字总表检字》,可以簡體查繁體、繁體查簡體,港生陸生,各識其唔識,慳水又慳力。

繁體字係漢語文化根本。當年我有修讀文字學、音韻學,《說文解字》、《宋本廣韻》、《粵音韻彙》等必用工具書唔駛講都係繁體字。你夾硬用簡體字教學,即係要文字學、音韻學失傳,根絕漢語文化。咁樣同伊斯蘭國炸毀千年古蹟有乜分別?有!你罪大惡極好多!

教育局「假好意」為學生將來,其實係特區政府「真陰謀」為中共統戰,不惜清洗香港本土文化,連中國千年文化都一齊滅絕。一旦文字統一,特區政府就會大條道理將全港官府中文招牌、信封信箋名片,以至交通標誌、戶外戶內公共標示,任何眼見得到嘅中文字都劃一簡體化。到時億億聲開支,你估邊個埋單?講唔定,就算唔立例管制,私營機構都會被迫自動自覺,乖乖跟大隊,一切從簡,你話幾勞民傷財。

咪話我唔早響:有心創業嘅朋友,公司中文名要改個冇簡體字嘅,揀地址都要揀個冇簡體字嘅街名大廈名,咪到時盞益咗招牌佬、印刷佬。

[後記:本來好抗拒口語化寫文,不過教育局咁唔中意,我又 OK 喎。]

發表意見