立場新聞 Stand News

紙皮婆婆與財仔歸天 聯和墟街坊哭了

2015/6/1 — 10:52

聯和墟紙皮婆婆繼忠犬財仔在不足三星期同被車撞倒離世,留下的,只有街坊的嘆息與眼淚,鄰里為婆婆存下的鐵罐,給財仔的雞肉,以及街頭巷尾一人一狗的身影記憶。

「還記得婆婆總會戴著很美的星星耳環...還記得每次見到財仔,婆婆都會話佢好乾淨好乖...還記得財仔有次同我玩得好開心,婆婆話財仔好鐘意我...還記得很多很多...可惜一切都只能成為回憶...」 — Pak

「真係好心痛呀!以前住粉嶺成日見到佢地兩口子形影不離⋯依家傷心到唔知講咩好!」 — Kaikai

廣告

「忍不住哭了,因為見過婆婆和狗狗很多次...願婆婆和狗狗都往生極樂。」 — Tiffany

「剩下的只有他們當天結伴的身影...」 — Rosa

廣告

「婆婆和財仔我識咗好耐,財仔真喺好乖,婆婆同財仔就好似母子一樣,婆婆、財仔一路好走,永遠懷念你們的笑容!」 — Queenie

「每次見到婆婆和財仔都感到好溫馨,一老一狗互相扶持,希望她倆在天國重逢,活得開心自在!婆婆財仔一路好走呀」 — Kwan

「願你安息,想念你與財仔的身影」 — Keith

「依家收工經過海聯M記門口, 好似少咗D嘢, 我踩單車經過黑狗仔會跟我單車尾!」 — Hin

「呢個婆婆細細個已經見到佢,住係一間50 呎都無既鐵皮屋,屋只係啱啱好容納到佢同財仔咁大,屋裏面咩都無,連去廁所都要去公廁,每次見到有人探佢,都只係一d 社區義工,我無見過佢d 仔女(可以係我撞吾到佢地啦),真心希望婆婆家人睇到會好好諗下,亦希望各位珍惜眼前!!」 — Lily

“Yesterday in 聯和墟 I still hear the Kai Fong talking about them. They are gone but they are still here. “  — Aiko

「每次買麵包都經過藥房門口就會見到呀婆執纸皮,而財仔就好乖咁趴係地下 等候婆婆 以後都再見唔到呀婆同財仔嘅身影了!」 — Chuilan

「亞婆被車撞嘅前一、兩天都有來我做的餐廳食飯,每次婆婆都是食燒鴨飯,最後果次還用袋袋住吃剩嘅燒鴨,我不敢問她拿給誰吃,以前一定是拿給財仔,我之前天天也見到婆婆和財仔,但現在想起也很難過...婆婆和財仔我經常摸她們的臉,願你倆在天上相聚,一路好走。」 — Memei

「我仲記得幾年前搬黎呢度,問過阿婆借手推車。以前落街成日會撞見佢地,阿婆好錫隻狗,成日幫佢梳毛,又見狗仔有靚衫著。狗仔都好乖,永遠跟住阿婆,見到其他狗都唔會叫...希望2位天堂再聚吧,好好安息,RIP」 — Miko

「以前落街成日遇倒婆婆同財仔, 財仔比車撞倒之後,我仲同阿妹講,財仔走咗,好唔好遲啲幫婆婆領養第2隻狗狗陪吓佢… It's really sad!」 — Connie

「 果陣喺對面間7仔做左幾個月,每日婆婆3點左右就會推架車仔黎問我地有無紙皮,每日都喺門口坐成個幾鐘同財仔玩,日日跟喺身邊寸步不離,我每日都會裝水比佢飲。婆婆成日讚財仔好乖,日日都同我地傾計。財仔唔食面包飯果啲,但好鍾意食牛肉乾定豬肉乾, 婆婆都成日買比佢食。果陣天氣凍,都比件好厚好靚嘅衫財仔著,自己就著好小 . 平時行過聯和見到財仔一叫佢就會走埋黎比頭o你摸,好乖好乖。」 — Milky

「財仔真係好乖,不論好天或是下雨,總陪伴著婆婆!聽到這個消息真的好傷感!」 — 敏兔

街坊對鄭婆婆與財仔的懷念留言不能一一盡錄,無數的RIP之間,還有絲絲遺憾。

「婆婆出事前两晚係海聯M記門口見到婆婆一個坐係度,望住婆婆獨自一個又無助嘅背影真係好心痛,當時湊住两個女未能上前同婆婆傾,好後悔冇上前安慰婆婆係我一個遺憾。」 —  Jackie

「我留左D罐比婆婆賣錢,點知再無機會比佢...」  — 大飯兵團

「姐姐仲爭財仔一袋雞雞? 願婆婆、財仔在天家上快樂!」 — 葉梓晴

聯和墟從此風景不再一樣,想念婆婆與財仔的,還有賓仔,財仔的狗友。賓仔昨日還如常走到婆婆鐵皮屋所在的後巷,狗狗嗅覺靈敏,婆婆與財仔形不在,留下的情味仍在。

 

相關場邊故事:守護紙皮婆婆的財仔 

婆婆、賓仔相片分別由 Rosa Yeung 及 Jay Leung 提供

原刊於場邊故事;原題為〈他們走了...他們仍在  紙皮婆婆與財仔歸天 聯和墟街坊哭了〉

發表意見