立場新聞 Stand News

細路辛苦 老竇老母又辛苦 做乜要咁呢?

2017/2/28 — 15:41

阿仔讀咗半年小一,我感受最深嘅係:「X! 功課好多,課程好深!」我心諗,阿仔依家學緊嘅嘢,我當年好似三年班先讀架喎。

但當我跟同期嘅家長朋友吹水時,卻發現,阿仔間學校,功課量已經唔算係最多嗰隻,而課程,亦算係相對容易的了。

香港嘅教育,其實究竟想點?

廣告

幼稚園話要唔俾K1學生揸筆寫字,當然係好事。之但係,小學一年級嘅課程,卻忽然三級跳咁深到仆街。咁幼稚園課程你又要佢地happy happy,咁當中個gap你想班細路點跨過去呢?阿仔讀幼稚園嘅時候,我成日聽到有家長投訴,話學校課程太淺,嫌佢地啲細路學嘢唔夠多。當時我覺得佢地係痴線嘅,咁細個要個細路學咁多嘢識咁多字做乜春先?冇細路仔嘅人會覺得,呢個必然係一班怪獸家長嘅虛榮心作怪,先會咁樣逼自己啲仔女。但實情係,純綷想威想勁嘅人係好少數,驚死驚追唔上嘅,先係主流。咁佢地既「驚」合唔合理?當你環顧一下,今日香港地嘅小學,佢地嘅課程有幾深同有幾多嘅時候…至少我自己就覺得,大家嘅「驚」係近乎理所當然。

我唔理解嘅,係點解一個小學雞要學咁x多嘢,仲要學到咁x深。學到咁深,又唔見得會令佢地變得更有興趣學習,又或者變得更叻。小學就學到咁深,咁上中學又學啲乜呢?於是乎我有個中學老師朋友同我講,正因為咁,所以中學嘅課程又要再design得再深啲囉,深到,連班老師都唔x識嘅先至叫做ok囉。

廣告

都係嗰句啦,想威嘅家長係有,不過唔係多數。驚死嘅先係主流。今日嘅社會成日話要家校合作,家長又要點樣去幫忙參與教育子女乜乜物物。家長要教仔,唔可以唔理個仔,當然係正確非常,但我有時懷疑,當啲課程深成咁又多成咁嘅時候,學校根本就冇可能自己教得晒,咁佢唔要求你班家長放工後幫手教埋一份至奇。我識有朋友,開學前嘅暑假早段學校就開家長會,叫班家長響開學前要自行教個細路教到第七、八課先好嚟開學。成本書都係得十幾二十課咋喎頂你,你叫個家長幫你自己教咗大半先好嚟返學?過份啲掛?

於是大家都不停咁追趕課程,日追夜追,追到,自己都唔知做緊乜,只係求,個仔個女唔好追唔上,唔好留班。

都係嗰句,其實點解要班細路咁細個就學咁多學咁深?反正又唔見得班細路會因為咁而大個嘅時候會變得叻咗。今日嘅結果係,細路辛苦,老竇老母又辛苦,連老師都係辛苦。做乜要咁呢?

有冇人可以解到呢個局?

發表意見