立場新聞 Stand News

網絡打假 — 與黃遠輝辯論 賽後報告

2018/7/12 — 13:16

圖片來源:作者 Facebook(香港獨立媒體網 Facebook 直播截圖)

圖片來源:作者 Facebook(香港獨立媒體網 Facebook 直播截圖)

(多資料數據怕長氣慎入)

土地需求估算

一向對政府講到欠 1,200 公頃盤數充滿疑感同質疑,第一個例子係工業(係一般工業,即九龍灣之類啲工廈),政府估算長遠需求升,但早十幾廿年仲話工業昔微所以係咁改劃成商貿區,因而估計未來工業樓面供應跌添。而家先話未來需求升返,係咪之前政策錯誤?係咪今天就應該停止所有工廈轉營申請啦?黃遠輝梗係講啲圓滑嘢,又話需求因為時代變遷,然後又話數據中心等都有需求。(咦,我返屋企 check 清楚發現政府 2030+ 報告將「數據中心」計入「特殊工業」喎,同「工業」唔同,佢借啲咦撈埋嚟講混淆視聽囉!)

廣告

骨灰龕土地需求

之前都有場合問過佢,呢 75 公頃需求點嚟,佢今次有備而來,即刻講 75 公頃當中包括 25 公頃係沙嶺擴建(第一次聽嘅新資訊)。咁我話,就算淨返 50 公頃,但據現時做緊嘅新建骨灰龕項目,平均 1 公頃可建 60,000 個龕位,50 公頃夠 300 萬個位,當政府估計去到 2035 年每年死亡人口只係約 6-7 萬,300 萬個位用到 2064 啦。佢仲要話骨灰龕同民居要有間距(buffer),ok 有排樹林做 buffer 無問題,不過樹林唔會計入骨灰龕佔地面積嘛!吖我一講具體數字佢就縮,跟住又話自己唔係骨灰龕專業(喂係你不斷用 1,200 公頃短缺來 sell 喎,我問細節你又縮,咁點說服公眾真係要咁多地?)

廣告

填海

睇嚟呢期都係狂 sell 填海喇。我問:政府而家做緊嘅幾個填海選址規劃研究,只有好少係做公屋居屋,欣澳仲要係悠閒康樂喎,咁唔好狂 sell 填海造地幫劏房戶啦。咁佢當然扯去話土地需求唔只住宅,仲有好多經濟發展需要,同好堅持今天造咗地先將來做咩可以再諗。我舉返西九填海例子話,當年規劃講到係幫九龍區舊樓重建疏導,但而家係九龍站上蓋堆豪宅。然後佢好堅持 — 無可能做到(無可能今天就定實將來幅地做咩用途)。咁唔好再推劏房戶/公屋輪候冊出來 sell 填海好緊要啦。再講到所需年期,佢話預計 15-20 年先造到塊地,不過引述啲工程界話填海而家其實好快,由倒第一批泥到有塊地出來約 3-4 年。咁我問沉降要幾耐呢?跟住又縮,又話自己唔係工程專業。(又帶返頭盔先?)

棕地

新發展區以外棕地,之前就話「零碎」難發展,佢而家改口話唔係「零碎」而係「零散」,因為見到本研社報告搵到唔少面積都大,如橫台山 70 公頃,不過佢話係偏遠零散。我話咁可以考慮 6-8 層鄉郊公屋,配合鄉郊 context,而且都有實例,如西貢/離島有。咁佢又去返講成本效益,即係要搞基建去到只係起鄉郊公屋,更加唔符合成本效益喎。(喂如果係鄉郊公屋規模有限都唔洗你搞好多基建 upgrade 先得啦;仲要講到起公屋成本效益大過天,以前都咁樣起,點解以前得而家唔得)

發展商農地

既然講到有啲棕地咁偏遠,咁發展商農地呢?我話黃遠輝成日話唔知那 1,000 公頃發展商農地分佈,但又好肯定有啲好偏遠一定唔可以以新發展區(政府收地)去發展,兩句話有矛盾喎。如果講到好偏遠,係咪要討論嘅係呢啲地應否發展,而唔係用土收定公私合營。跟住佢遊咗好耐都回應唔到個矛盾,都係硬撐公私合營都只係一個建議。

點心紙落 %

佢最後都係講到唔係否定棕地同發展商農地。但點心紙上就要加嗰 15%(即係:新發展區外棕地及私人農地都係短中期選項,本身潛在供應分別為 760 公頃及 1,000 公頃,但分別落嗰 15% 就假定短中期十年內最多我同你發展 110 公頃及 150 公頃。) 點解係 15%?唔係多啲或少啲?無,從來無科學化解釋,只係「我哋小組討論過」就當係解釋。吓?

公私營房屋比例

問到政府估計嘅住宅土地需求 1,670 公頃,當中公營住宅地:私營住宅地比例係約 3:7。就當公營住宅基於成本效益同配套需求多數係高密度喇,但點解咁多地預俾私營?即係包括低密度豪宅?講到搵地咁辛苦,仲要留啲低密度豪宅地?咁佢當然又不斷講超過居屋申請資格一群都要私樓…(但剛超過居屋申請資格同住得起 2-3 層樓高豪宅嘅差好遠喎!)

最後戲肉

佢講到上個月林鄭好好啦,宣佈將九幅位於安達臣及啟德私樓地轉做資助房屋,都係好嘅方向,當中啲資助房屋包括首置盤(<-- 呢句係黃遠輝講㗎!佢承認咗首置當資助房屋!)得喇大家唔使以為林鄭肯轉九幅地就跳起 Yeah 因為呢九幅係包首置㗎,市價七折咗都過萬蚊呎嗰啲都當啊!大家都唔使對林鄭講咩未來公私七三比有幻想喇,可預計佢新增嘅公營都只係首置~Bye

最後—無咩感想,好很攰。佢係一貫滑頭,你話佢好熟書咩?面嗰層係,但同佢進入去細節,佢就縮,又話自己唔係專業。黃生真係非工程專業,不過係推銷專業。細節係悶,不過請大家唔好放棄,因為越講細節就可發現成個土地大辯論資訊何等虛浮。

 

《獨媒》網絡打假 11-7-2018 重溫
以上講嘅 2030+ 估算數字,可睇返 2030+ 專題報告(9a)「綜合土地需求及供應分析」

原刊於作者 Facebook

發表意見