立場新聞 Stand News

續談「名校」

2015/3/6 — 15:06

資料圖片

資料圖片

另看作者前天文章〈名校出庸才?

有關名校的問題,我嘗試組織一下自己思維,以下屬粹是個人意見,歡迎討論。

1) 名校係倒模…

廣告

某程度上我覺得呢句話沒有錯,但實情係,倒模既不單止係名校。唔出名嘅學校就唔倒模?唔會啦。傳統既香港教育方式,就係訓練考試機器與及train你準備將來去做社會既一粒「小螺絲」。同學校既名氣,我覺得冇直接關係的。

2) 名校功課特別多…

廣告

我認識既朋友裡面,讀名校果班家長固然係勁鬧學校谷得啲細路太勁,晚晚功課做到十一、二點先掂;但估唔到既係,即使唔係名校既家長朋友,我同樣係聽到佢地啲功課係多到做唔完,默書測驗亦多到應接不下。我諗呢個應該係教育局對學校既政策問題,令到一眾學校,無論你有名無名,都要被逼「自強」提升全校成績既結果。我唯一聽過比較少「功課煩惱」既家長,就只係啲細路讀international school/IB課程既朋友,不過當然,國際學校又一樣有其他問題的,遲下有機會先講。

3) 名校師資特別好…

這個我算是有第一身的經歷 (雖然係好多年前)…然而這點我倒不大認同的。名校學生成績好,最大的原因是校內的競爭氣氛。這種緊張氣氛,讓同學們大都會自動自覺咁努力讀書溫習,結果就係集體成績好。至於老師嘛…可能是我自己的偏見,但我覺得在名校裡的老師反而相對有條件hea做一點,反正班學生係咪都會努力讀書的。講有heart有熱誠,我反而傾向相信,非名校的老師可能還會多一點點。

4) 快樂童年…

「快樂童年」四個字,個個家長都識講,但點樣先真正俾到自己個細路有個快樂童年?其實大家都係靠估。坊間講得最多既,係嗰啲少功課少壓力既學校,會比較容易為孩子製造出所謂既快樂童年。我自己作為N年前既名校產品,有冇因為功課好多測驗好多就冇咗個happy childhood呢?老實講,我自己當年其實feel唔到的,主要因為響你身邊既同學仔個個都同你一齊捱緊,你根本覺得這個就是常態。我諗,只有「試過舒服」之後,先會feel到多功課多測驗其實係好辛苦的。咁會唔會當年我讀間少啲測驗少啲功課既學校,我嘅童年會快樂啲?我冇試過,唔敢亂講,不過斷估既話,可能會吧。

功課多測多雖然多,as long as你跟得上既話,個人覺得其實未必會太過破壞你既童年既快樂感的。但以我自己當年既經驗而言,在名校裡長大,最讓我覺得唔多happy既,係當中那隱隱約約所感受到嘅階級觀念。細個既時候我講唔出點解我響學校裡面會有啲唔開心,長大之後望返轉頭,先至明白係甚麼的一回事。

5)舊生network會好啲…

我諗名校都有好多style的。有啲學校雖然出名,但係讀既同學仔相對平民一點,咁畢業之後大家個network會比較keep得住。另外有啲名校,比較blueblood一啲,入到去讀,總會撞到十幾二十個乜乜富豪後人嗰啲…咁個network既架構就往往係,嗰個階層既就同嗰個階層既同學去network囉,你係普通人就同返普通人network囉。咁,算唔算特別好?

我覺得,好現實的。如果一心諗住「高攀」的,通常都高攀唔到的。

6) 選擇…

我啲細路,都就快要考小學了。我成日諗,揾間名校俾佢係咪一定好?(ok,實情係就算我真係覺得好都未必有得入)正如之前講過,學校同學生,講既係夾唔夾、適合唔適合;冇話邊間學校一定好又或者一定唔好的。問題係,考學校既時候,細路仔得個四、五歲人仔,我自問日日對住佢地,都唔知佢係咪一個所謂既「名校料子」吧。

但其實我都係好現實好羊群的。撇除甚麼虛榮心,當你冇十足把握甚麼才是真正適合自己個細路嗰陣,人就自然會傾向相信名氣了。我覺得這是大部份家長不願承認既現實。假如明天我個仔面前有兩間小學話肯收,一間係名校,一間係不知名小學,咁如果你係我,會點樣選擇?

另一個問題,就係所謂「適唔適合」了。這個問題我一直有所掙紮:其實點樣先叫做適合?到底你需要一個環境,讓你既孩子能夠發揮長處,而佢既弱點不會在那個環境裡面過份暴露;還是你需要一個相反的,讓孩子可以走出自己comfort zone,刻服自己弱點既地方?同一個孩子,家長既approach係前者還是後者,對所謂「適合」既學校既選擇,應該會有天同地既分別吧。

我認識有些朋友,對教育子女,又或者對選擇學既考慮時,會有一套非常肯定,甚至係我認為傾向武斷、極端既想法。當然,我對我既孩子應該選擇咩學校讀書,其實都係有點preference的,但對此,我自己既反省係:當中我這些想法,很大程度其實是將我自己投射咗入去;我覺得自己以前欠缺咗些甚麼,我希望「做個相反」地去令我既孩子不會失去我失去過嘅嘢。但實情係,佢係佢、我係我,而且時代也真的差了很遠,即使是同一間學校,三十年之後,其實甚麼也作不了準。

祝大家有個愉快的週末。

 

標題為編輯所擬,原刊於作者facebook

發表意見