立場新聞 Stand News

罷工的人

2019/2/17 — 10:25

作者製圖

作者製圖

呢張係非常珍貴嘅照片,噚晚一個英國嘅好朋友特登由英國寄咗呢張相俾我,俾個驚喜我(好窩心呀!)

華航機師今次嘅罷工同三年前華航空中服務員嘅罷工都帶俾我好多嘅感觸。呢張相對我嘅人生嚟講,標誌住一個不可磨滅嘅印記 — 就係 2010 年英航希斯路基地國際艦隊嘅同事罷工,超過 13,000 名空中服務員會員喺希斯路機場進行為期二十天嘅罷工。我就喺呢場風暴嘅中央,往返罷工基地核心團隊同主要會員中間。

嗰年我正正就係帶住香港同事處理緊長達六年嘅官司。當時我仲係短頭髮,成日帶住個側揹手袋(個手袋我今天仲保存住呀),遊走國際工會令找見證住唔同工會點樣面對僱主嘅不公不義打壓,仲有佢哋嘅各式各樣抗爭手法。罷工從來都唔係鬧著玩,更加唔容易踏出呢一步。當走到罷工呢一步,外界就只會知道:呢班人罷工喇!迎來嘅有批評亦有支持,但鏡頭以外,大家可能都唔知罷工之前,工會用了幾多時間談判、談判咗幾多次、關係點破裂、又或者點俾僱主無視、當透明終等等先要走上罷工呢步,呢一切都可能從來冇人有興趣研究。

廣告

八年前嘅罷工,我曾經發表咗一次演講,現場應該大約有 2,000 人左右,主要都係鼓勵大家振作,今日都諗唔起具體講咗啲咩,但原來往後嘅日子幾千個聽過我演講嘅同事話我俾咗啲啟示佢哋,話一個小小嘅香港女子令佢哋明白點樣膽粗粗咁去抗爭,如果連小小嘅香港基地同事都做得到,無理由過萬名英國基地同事做唔到。當時大家都明白我哋要守住嘅係我哋嘅未來,因為僱主會成立一條全新嘅艦隊逐步取替我們嘅工作,所以今天唔企出嚟,你嘅「未來」都會變成泡影。

過程難唔難?難呀!唔同會員都遭遇到挑釁、收到管理層電話恐嚇,但我哋就從中學識點樣駁咀,連我哋嘅家人都收到公司電話都會反駁,「點解我個女唔可以罷工?你卻可以獲得巨額花紅?」

廣告

成果係屬於一班有付出嘅會員,但有少量厚顏無恥嘅人仍然會想坐享其成,都曾經有呢啲厚顏無恥嘅人日後工作犯錯,要搵工會幫手求情,求情理由仲要係佢無參加上次罷工,希望公司網開一面。結果係點?你話呢!

始終我都仍然堅持一個信念:集體談判權從來都係同僱主夥伴同行嘅重要基石,可以談判嘅話就應該談判、無計可施先會考慮罷工。

(謎底:左前方第三個,用手遮住口、著白色衫嗰個!well……我認我係肥妹仔!)

#祝罷工愉快
#華航機師好嘢

 

作者 Facebook

發表意見