立場新聞 Stand News

義和團後繼有人,五毛打手自愧不如

2019/2/12 — 18:34

陳文鴻(圖左)、陳啟宗(圖右)

陳文鴻(圖左)、陳啟宗(圖右)

今天可說是受教,也大開眼界,得知兩位陳姓高人的言論,原本的憂慮完全冇哂,仲好開心㖭。在此順便奉勸一句那些不站穩國民愛黨立場、不願意放棄獨立思考、不與國內同胞站在同一陣線、不支持中共政權的好事之徒,「你們不要開心得太早」。因為根據兩位高人的說法,中美貿易協議一旦無法達成,絕對不是問題!而且肯定是對國家民族有說不完那麼多好處的大好事!大家等着瞧!偉大的導師早就教育你們:「風物長宜放眼量」。大家應該學學兩位陳姓高人的長遠目光,好好學習兩位高人的獨特見解。

根據陳老板的高見,如果沒有貿易協議,絕對是一等一的大好事。根據他的說法,有咁多好處,係咪應該主動反枱離場?根本無需多講,亦不需要再理會侵侵那個協議期限?

反過來說,中方應該馬上提出,如果美國佬唔主動即時規定全美使用華為的設施,中方便「一定」會於期限之前與美方「達成協議」,令美國佬蒙受陳老板所說的各種損失。

廣告

記住,係冇協議中國都冇損失,仲有好多好處㖭。冇協議,美國才是損失慘重。有協議才是中國人蝕底!咁點解仲要爭取有協議? 點解要爭取有協議來益美國佬,仲要自己吃虧?仲要平白失去了更多更好的機會?

中方仲駛乜理那個限期?使乜派人去美國開會?駛乜在北京招呼美國代表團?趕佢哋走啦!即刻拉隊離開美國啦!

廣告

而且據佢講,咁樣做中方贏哂。首先就可以推動國內自身的科技發展,「成就中國研發自家技術」。如果陳老板說的沒錯,這只會對美國佬及西方社會不利,只會使中國人得到更大的好處,將來更有條件主導全世界。如果咁荀,有乜理由需要放棄?仲要埋枱同美國佬講條件,有冇搞錯?根據這樣的邏輯,如果與美國佬達成協議,中國人咪好蝕底?咪等於主動放棄一個垂手可得嘅「成就」!

而且好似講到中國完全冇代價喎!

「中國金融應與全球有一定隔離」,咁就冇協議都唔會搞到人民幣要貶值啦?係咪好似有啲自相矛盾?

冇問題,佢又咁兜喎。就算真係人民幣要貶值,也是或使「美國淪大輸家」。咁達成協議,人民幣失去貶值的機會,咪可以令美國佬避過一劫,唔使面對人民幣貶值而對美國佬做成的重大損失?美國佬咪又可以唔使因此而成為大輸家?咁有乜理由要同佢達成協議!

即係話冇協議中國先至贏哂喎,點解仲要爭取達成協議?點解要咁益美國佬?講唔通喎?

另一位陳姓高人陳教授也太長別人志氣,滅自己威風。佢可能冇留意到,根據陳老板邏輯,冇協議對中國仲好,何解美中貿易關係緊張就會令「中國的經濟增長回落」?才疏學淺,睇唔明。

或者倒轉頭講,陳老板可能應該聽聽陳教授的講法:「中國經濟增長回落是好事」,因為可以不讓「美國的消費主義發展」,不要讓美國式的經濟發展模式及消費主義毒瘤蔓延中國。

唔知陳教授有冇周圍睇下,依家去到世界各地,消費主義毒瘤最嚴重的是強國人還是美國佬?「I buy therefore I am」這一種極端的消費及擁有慾望,在什麼人身上最明顯?食到盡、消耗到盡,這一種物欲橫流的心態及行為,又是那一個人種表現得最徹底?有乜人會拖住個一個甚至兩個拖喼周圍碌,仲會在路中央攤開三個喼展示及擺放戰利品?其實都唔使去到好遠,去尖沙咀就睇到。或者搵間專招呼強國客嘅中價酒店食餐自助餐,就一定可以有深刻及切身嘅体會。

美國佬以前點,大可以繼續批評;美國佬今日點,也可以繼續批判,但把「消費主義」這個概念一股腦兒地掛上「美式」或「美國」這個標籤,顯然是過度簡化,起碼也是「過時」。

此等言論可稱「大師」級,邏輯境界之高令人難以理解!言論之自相矛盾令人大開眼界!

如果陳老板認為自己講的這麼有道理,唔需要理會有沒有說服力,那就請積極勸喻或遊說中方,盡快離開談判桌,根本無需同美國佬傾。或者鼓勵中方代表團盡快與美國佬達成協議,輸死洋鬼子,輸佢哋幾代,輸到佢哋世世代代永不翻身,為你們的祖先義和團洗脫八國聯軍的歷史恥辱。

對於陳老板敢於「言人所不敢言,言人之恥於言」的勇氣,與藉此彰顯出來「扶共滅洋」的氣魄,與萬千中華兒女的老祖宗義和拳那一句「扶清滅洋」口號,可以說是遙隔過百年而互相輝影,映照千秋,證明中國人社會確實在百多年間有長足的進步,證明共產黨真係好偉大。中國某一類知識分子及買版階層,也確實比百多年前更長進。

此等言論,相信必定足以令愛國賊羞得無地自容,愧見江東父老;嘍囉打手也折伏得向高人棄械投誠,拜為上師;一眾五毛也只得自知身價,以後只能大幅度打折扣自貶為三毛。

 

作者 Facebook

 

 

 

 

發表意見