立場新聞 Stand News

「老虎」要車你㗎?

2017/11/6 — 7:00

【文:格物虎 @全民教育局 HKEd4All】

老虎住嘅地方同薄扶林大學實在相距太遠,所以與其逼西鐵同捱貴巴士,老虎一考到車牌就買咗架車仔,代步之餘仲可以搏下桃花。一個月過去,桃花就冇嘞;反而 Freeriders 就引咗一大堆 — 唔係做 assignment 啲 freeriders,係真真正正嘅 Free-RIDERS。

呢排電話總係響過不停,顯示嘅 notifications 同的士台冇乜分別 —

廣告

「 老虎今日過唔過海?」

「 老虎仔~~天水圍入唔入吖~ thxxxxxxxxxx」

廣告

「 Tiger Gorrrrr 我一陣返 hall 吖,你 QM 放低我得唔得吖~」

坦白講,有時啲同學要去啲地方就算完全唔順路都好我都會車佢哋,當訓練下自己手車又好認下路又好都冇乜所謂。不過好多同學仔都會幫我俾埋隧道錢 as a form of gratutite。我好感恩我有啲咁識做嘅同學,不過人生總係會遇到啲不可理喻嘅人。

話說有日放學,我行去停車場攞車嗰時咁啱撞到個平日同我冇兩句嘅女同學 Candice ,我哋四目交接,互相點點頭,之後我轉嗰三分波開車門。正當我扣緊安全帶嘅時候,後門突然打開咗。我嚇咗嚇望望倒後鏡,已經見到 Candice 係後座尤如女皇般嘅坐姿,一副毫不在乎嘅表情,同埋聽到一句:

「 開車啦。」

我呆了。
我想不到有人會未問准就上人哋㗎車;
我想不到有人坐車係一坐就坐後座;
我想不到有人會一嚟就叫我開車;
我更萬萬想不到,呢個人,係我同學。

有一刻以為我其實係一個的士司機,就問佢:

「 咁請問妳去邊呢。」
「 美孚。」
「 不過我直上三幹入屯元天喎。」
「 哦。咁你美孚站放低我啦。」

我茫然的望著 Main Building ,默默的駛離港大。

四十五分鐘的車程,Candice 一言不發地用著她手上的 iPhone 8,想必係 Whatsapp 溝緊仔。

四十五分鐘的車程,老虎一言不發地緊握著駄盤,係心裏面講咗無數萬次粗口。

到咗美孚,Candice 淡淡的講咗句唔該,再猛烈的關上車門。

後來我在屯門公路上飛馳時大叫咗啲乜,我都已經唔係好記得。

但係我鬧佢死港女、冇家教同埋 「 老奉要車妳㗎」應該不下九十次。

自此之後,我冇再同佢講過一句説話,因為 —

//老虎、老奉要車你㗎?!//

(完)

發表意見