立場新聞 Stand News

老Fei出省記 — 關於網絡公審

2016/5/16 — 10:48

港鐵 Facebook 圖片

港鐵 Facebook 圖片

【文:老Fei】

一年搭唔到幾次地鐵,今日係今年第一次。

臨到站口,頸渴,買咗包維他375,啜下啜下,到咗站口仲有一半未飲完。究竟地鐵係入閘後唔畀飲食?定係入咗出入口就唔得?我覺得應該係前者,但萬一記錯或者改咗規定呢?

廣告

相機無處不在,正義嘅朋友金睛火眼周圍掃瞄,捕捉每一個違規的時刻。萬一轉頭在FB上見到自己耽住包檸檬茶、吊吊揈在地鐵站內,加一條《香港淪喪之站內飲食不知廉恥》之類嘅標題,真係唔知點算。

算!嗱嗱聲啜完半包,打個飽嗝,信心十足行入地鐵站。

廣告

入到車廂,人都唔少,不過仲有空位,亦都有人企住唔坐。

你以為我會大咧咧坐低?少年你太天真了。以我在浸淫網絡鍛煉出嚟嘅高度警覺,第一時間梗係睇睇周圍有冇老人孕婦或者傷健人士,跟住觀察下有冇人面帶病色、甚至有冇女士顯示出生理期嘅跡象。如是者已經過咗兩個站,依然有空位。

我開始後悔,冇棟一支拐杖或者將右膝頭打上石膏先出門 — 以前影相時失足受傷造成的舊患開始隱隱作痛,痛楚好似一隻白蟻在快樂地噬咬著我的半月板。

唔理喇,坐咗先。但當然唔會放鬆警惕,你知啦,好似我咁出眾嘅麻甩佬,最容易成為鏡頭捕捉公審的目標,一陣如果在FB上見到自己張相,佐以《港人之恥自私精》標題,真係好似畀狗屎掟中咁無辜,呢個年代,好多人樂於掟人狗屎卻不介意自己渾身惡臭。

提心吊膽,到咗目的站,臨下車時,旁邊一個年輕媽媽帶住小朋友,我還很有風度地側身畀佢哋過咗先,免得同佢哋搶道,然後先跟住佢哋後面,望住小朋友個背影,慢慢行出去,驚撞到佢哋。

回想至此,突然嚇出一身冷汗.....嗰位年輕媽媽好似著住條短褲,好緊身嗰隻,我望住佢旁邊嘅小朋友背影,視線從其它角度望過嚟,會唔會以為我色迷迷地望住年輕媽媽個pat pat???我嗰種友善的微笑,一定就係淫笑了吧?咁FB個標題會係.....

鏡頭無處不在,
正義者就在你身邊,
鍵盤戰士戰無不勝......

好驚好驚。

點解一個有可能係清白嘅人,要去要承受別人自以為是(可能中亦可能唔中)的髒水?然後仲要佢自證清白?

造謠張張嘴,闢謠跑斷腿。

想解決件實事,一係當場出聲,你有責任心,對方都有解釋嘅機會。出句聲就得。

憑住割裂於前文後理的某個孤立影像或片段,就夠膽大義凜然做出表態而且死撐到底,真係唔知邊度嚟嘅自信。或者係現實中的不自信可以在網上得到彌補吧,儘管那是虛妄的。

多謝各位不影之恩。

發表意見