立場新聞 Stand News

聲稱有憐憫心的施政者,可否正視拾荒者、回收舖的困境?

2019/6/6 — 18:41

圖片來源:拾平台 Facebook

圖片來源:拾平台 Facebook

圖中呢張被壓縮後紙皮嘅相,攝於 2017 年 9 月回收商停收廢紙行動嘅第一日,位置在旺角某間街角回收舖。

當時,回收舖老闆娘麥太同夥計忙緊執空舖頭嘅地方,想嘗試騰出多啲空間,去存放仍有街坊送來嘅紙皮。

我問佢,回收商已經罷收,點解你仲繼續收嘅?

廣告

佢話:「有啲婆仔未知發生乜嘢事,唔通幾十歲叫佢推番成車紙皮走咩?況且有啲真係每日靠呢十幾廿蚊買餐餸,自己收得幾多咪幾多囉!到塞滿間舖咪先唔再收囉……」

呢幾日,由於國內兩大龍頭紙廠再度調低採購價,預計最快月中開始紙皮回收價將再被跳崖式下跌,有傳媒詢問有關情況對拾荒者將造成有多大的影響。

廣告

無可否認,對拾荒群體當然有很大嘅影響,但更想講嘅係相信對街角回收舖嘅衝擊將更致命……

其實,現時在全港坊間接近三百多間嘅街角回收舖及回收車,當中有好多都係已經做咗好幾十年嘅老行專,好多時同佢哋傾計時,經常都聽到佢哋話,好後悔入咗呢行……

首先辛苦唔使講,其次係回收業呢一行,從來沒有被政府重視過,所謂支援,咪嗰十億回收環保基金囉,根本對佢哋呢種中小型街角舖係冇任何幫助,反而只係大型回收公司得益……

咁不如改為直接補貼,租金又好、運輸又好、差價都好,但政府一句話呢個係自由市場嘅運作,政府唔應該介入同干預,又再次將垃圾廢物回收,本身應該係政府施政政策嘅責任,就咁推卸給回收舖同拾荒者去承擔……

除咗對政府有好多不滿之外,回收舖都覺得市民普遍對佢哋業界嘅印象同觀感都係差,認為佢哋污糟邋遢,又經常阻街,明明係幫助緊個社會減少廢物送往堆填區,但反而被人視為在社區係環境衛生問題嘅製造者……

對於今次嘅危機,有回收舖經營者直言話依家同「等死」毫無分别,正如麥太所講:「做咗幾十年,你叫我仲可以轉做邊行呀?我就話可以退休啫,仲有班老夥計呢?唔通叫佢哋走去勞工處搵工呀?」

其實真係好想問呢個政府,當施政者話佢哋自己好有憐憫和同情心嗰陣,又有冇同樣用過呢份同理心去面對回收業界前線,包括幾百間回收舖同幾千位基層拾荒工作者所面對及處於嘅困境呢?

還是就這樣繼續不聞不問,由得呢個回收業唇亡齒寒嘅境況發生,自生自滅,最後惨被成為淘汰的一群?

而將被消失的,更不只是一個行業,卻是在社區中不同持分者所建立的人情味,以及鄰里脈絡的關係,不過可能對於現今已經去人性化的政權和施政者,已經視之如糞土。

 

(標題為編輯所擬)

拾平台 Facebook

發表意見