立場新聞 Stand News

肖友懷案 • The Newsroom • 道德風險

2015/5/26 — 1:56

The Newsroom截圖

The Newsroom截圖

事先聲明,我認為對非法入境者所謂酌情,寧緊莫鬆,今次呢單我都係認為應該從嚴處理。

不過,最近嘅事情發展,有啲地方令我諗起The Newsroom有一集,講處理非法居留者嘅法案問題,個助導Maggie係同情非法居留者,而主播阿Will就相對唔同情佢地。成件事其實作為一個公共政策問題討論,係可以理性一啲。劇情嘅結尾,係Maggie撞大板,結果令live嘅phone-out訪問到個極右騎呢怪「學者」,個「學者」發神經咁亂嗡,令阿Will揹大鑊。

不過Maggie提到一樣嘢,似乎係度度都發生緊,就係一講到非法入境者問題,好多人就上晒頭,幾惡毒嘅嘢都講得出,結果個討論就離題幾百萬丈遠。

廣告

至於走去間小學度抗議,講句公道說話,個細路女係後來先出現,其實都唔係太關示威者事,但係去搞間小學,其實又係令件事焦點更模糊。教育界會因為人權理由唔理政府要求而收有行街紙嘅適齡學童,保障佢地等候入境處最終決定之前嘅受教育權,呢個係唔少學校嘅做法,不論係當年嘅天主教學校,定係而家呢間親建制辦學團體嘅小學。

呢單嘢,工聯會陳婉嫻高調開記者招待會,佢同記者講話係要俾壓力入境處。佢拎個0靚仔出嚟開晒樣咁高調開記招,佢究竟食錯咩藥,以為咁樣會得到社會同情,同情到可以向入境處施壓?佢而家咁搞,似係同香港人做壓力測試多啲。佢拎個0靚仔出嚟,結果就係輿論更反對酌情,入境處更加企硬。雖然我認為應該從嚴遣返,但多口講句,陳婉嫻如果真係要幫非法入境者爭取居留權,佢基本上係做緊相反嘅嘢。

廣告

或者有人會問,點解我認為要從嚴。我唔係冷血,但入境政策就係入境政策,太容易循非法途徑留低再得到酌情處理,會造成道德風險(moral hazard)問題,鼓勵更多人以非法途徑入境或逗留。咁樣係咪好無情?其實抵壘政策取消至而家呢三十年,政策一直都係咁,就係遣返非法入境者,唯一唔同嘅係97之後有雙非呢條捷徑。

為免又有人速讀睇漏,我講多次,我認為呢單case應該從嚴處理。如果要屈我同情包容大愛乜乜乜、或者屈我唔理香港人有幾慘點解唔可以X個事主,我阻唔到。

 

原刊於作者博客

發表意見