立場新聞 Stand News

腦細,其實冇人想見到你哋

2019/4/13 — 9:24

Photo by Rebrand Cities from Pexels

Photo by Rebrand Cities from Pexels

【文:大庸才】

有啲物業管理公司,高層鍾意搞 Party ,邀請員工參加,順手體察民情,關心下屬,了解下面情況。但  sorry 腦細,呢啲所謂 Party,冇人想去,你亦得唔到想要嘅嘢。

首先,作為大老闆,你唔會知員工面對你哋,幾咁大壓力,精神異常磞緊,因為你哋一句說話,我哋可以聽日唔駛返工。冇錯,你哋可能係 nice guys ,但陷世界都唔識你哋,唔知講咩說話你哋先啱聽,只會令我哋精神緊張到頂點。

廣告

直接講你唔明,我用例子講俾你哋聽, search 下「扮工時間」,你哋就會發現,今時今日辦公室遊戲規則,就係腦細唔走,全世界都唔駛旨意走。你覺得自己唔係老虎,唔會食人,又要 sorry ,陷世界都驚你係。

到你哋體察民情嘅 intention ,睇《監獄風雲》,太平紳士問:「有冇投訴?」但應該記得梁家輝投訴完,有乜下場?你哋認為會問到咩真相出黎呢?結果就係個個都話上司對自己好好。

廣告

冇錯,以你哋喺呢行功力,行個場一次,已經知道管理得掂唔掂,冇嘢逃得過你哋法眼,即使 fresh grad 都絕對有咁嘅道行,但我好肯定咁講,係多餘嘅,有名你叫客戶服務,come on boss,customer is the king,如果個客唔 like,上至經理,下至普通保安,你晨早叫佢躝屍屹路啦!今時今日,ISO 同年檢各樣,已經搞到個個死去活來,就唔好整多樣啦!

施永青係一個人人話佢仆街嘅仆街,但始終佢係成功商人,用人哲學值得參考,就係交俾市場決定個人適唔適合,如果市場,即係個客都滿意嘅,咪冇問題囉,如果個客認為有問題,相信你都保佢唔住。

親愛嘅腦細,請唔好再親愛地擾民鳥。老老實實,你見個個笑口吞噬噬,烚熟狗頭,其實個心詛咒緊你哋:「快啲走啦,仆街!」

發表意見