立場新聞 Stand News

致FFx經理人SAM:還錢

2015/9/19 — 11:19

(認真MODE)致FFX經理人SAM,趁件事仲有人討論,我想公開幫我個朋友追一追數,其實我有個朋友曾經幫閣下拍過嘢,直至現在都仲爭佢$500,既然$900可以拍到一個MV,其實$500真係唔係小數目,可以拍0.5555555555… 個MV,希望SAM哥盡快還錢比我呢位朋友,因為我呢位朋友,自拍完嘢後,搵你唔到。

題外話,其實我係今日先正式睇,響呢個時代,成功嘅定義好廣泛,響FFX因為MV突然上C1嘅同時,其實香港音樂人黃靖、李拾壹響 音樂蜂 MusicBee 剛剛出咗碟,不惜工本拍MV做緊宣傳,同日YoYoSham岑寧兒開Show,我嘅歌手曹震豪做完林一峰一人一結他SHOW嘅暖場嘉賓,然後飛到上海唱緊歌,組合PlayTime日日做緊Busking,自己拍緊MV,我地都冇錢,我地都冇資源拍MV,我地都做緊音樂,無心抽水(但我唔抽良心過意唔去)我有時同一D拍片嘅同學仔傾計,佢地問我,點解咁努力拍片都冇人睇,我一直都答佢地D嘢未有人去睇係因為未夠好,永遠可以再好D,加油…… 但呢個世界總係教我地逆向思維,D嘢冇人睇,係因為未夠壞,未有壞到被批判嘅資格。

娛樂性係來自壞品味,唔係今日嘅事,能一日登上C1全頁及各大主流、獨立媒體,同橫掃討論區,PR角度,係非常成功。

廣告

但成為Hot Topic後,討論是免費的,嘲笑是免費的,侮辱是免費的,到底點樣可以從中取利?大家放心,一定會有壞品味廣告商、媒體、製作單位不惜付錢,去觀賞壞品味,大家以為佢地冇得做,其實搵錢就趁而家。大家會問,咁壞仲邊有人睇?最少,有80萬人睇,係因為想睇有幾壞。

所以希望SAM盡快把握時間賺多D,找返我朋友條數,感謝!

廣告

發表意見