立場新聞 Stand News

與比卡超上個早會

2016/10/7 — 10:35

本文圖片由作者提供

本文圖片由作者提供

一直堅信,選校嘅首要考慮,係快樂。

所以每次參觀女兒學校嘅操場早會,我都好欣慰,覺得自己㨂啱咗學校。

早會節奏明快,冇冗長沉悶嘅說理,都係輕輕鬆鬆,而我最欣賞嘅,係完結後學生魚貫跟隊上課室嘅時候,會有老師帶唱歌。

廣告

大家想像一下個畫面,全校師生一齊唱住行、唱住上課室。帶唱嘅老師,唱唱吓會遞枝咪俾行緊嘅學生唱兩句,好似演唱會咁,俾全校同學都聽到自己高歌兩聲。

每次我都好留意嗰個被遞咪唱兩句嘅學生。每個唱完,都面露滿足嘅微笑。因為當天早上,佢成為咗焦點,成為咗學校演唱會嘅主角。

廣告

參觀今日早會,學校又將我對快樂學習嘅想像,帶到新高峰。竟然有幾個 Miss,一齊扮寵物小精靈,用一個小話劇,借學校作舞台,帶出正能量嘅訊息。

學生睇得快樂嗎?唔使問吧?旁觀嘅家長都笑到停唔到口。

小話劇做到尾聲,旁白嘅老師用柔和嘅聲線講:「呢個故事仲未完嫁,想知道結局係點,留意下星期二嘅早會啦!」

「仲要分上下集咁正!?」我忍唔住叫咗出嚟。

咁嘅早會,點會有學生唔鍾意上?我都馬上打開我個 iPhone Calendar,喺 0800 Mark 低:

與比卡超有個約會⋯⋯ 諗咗兩秒,我再改成:

與比卡超上個早會。

 

原刊作者facebook專頁

發表意見