立場新聞 Stand News

蠔油 • 豪遊

2015/5/11 — 19:04

【文:Joey】

繼五一長假高官議員「偷呃拐騙撐政改」:工聯會勞動節遊行賣豬仔,高民望呃細路,袁國強阻人做生意,陳智思「亞媽㨂老婆」之後,政府「林鄭方案」支持度稍有下跌!三大電視台馬上 cut budget 剎停資助三間大學滾動民調,輸打贏要之心昭然若揭,所謂「民意」,不過是站台助威道具。

今個週末又有白頭周融「威逼利誘撐政改」:「老板叫我黎簽名」,呃英語洋婦「撐民主」被怒刪簽名,派蠔油老點亞婆,免費遊學團面試撐政改拍片擺上網⋯⋯老中青男女中外都唔放過。

廣告

我都做過學生仔,又打過工,睇到中學生被拍片擺上枱,最最傷感!

Selection Interview 有好多玩法:stress interview 刁難你考反應,分組討論考表達組織能力,甚至叫你 role play 正反雙方辯論睇你邏輯,都得。舉個例,招聘公關或政府 AO,叫你就一單時事爆鑊,為公司或政府立場出新聞稿解話,就係考驗面試者應對能力。但係唔代表面試者本人立塲噃 ~

廣告

問題出於今次個「局」:廣西社團總會以「免費美國遊學」為名,叫人討論政改立塲,已經係「離題」!你開列條件對象係「品學兼優的14-17歲在學學生」啫,而家 40 個參加者出席,有 8 個話「支持政改」你就請去 next round,「過關」入房錄影,咁其餘「唔撐政改」嗰 32 個,係咪篩走咗?

鄧清河會長仲要大大聲聲咁話:「撐政改係天公地義的事」,利誘學生,政治審查,算咩呢!

張問題紙比埋支持論點叫候選人 take side 演繹,然後放上網公開:做 interview 有「道義守則」,你叫人 take stance 考人表現,就無理由擺人上枱當係「比口供」,仲錄影剪接發出街放上網,明顯係:出賣。

Personnel 人事管理,有種專業操守,有所不為,例如:老闆上司,出糧者手執升職加薪決定「權在我手」,就唔可以叫伙記去政治集會,去簽名撐乜乜乜,咁係:濫用權力。That is harassment。但係現今社會,連做人基本價值操守都日漸失落,「打份工要撐老板」出賣人格,可悲!

亞婆簽個名,為支蠔油出賣民主普選。學生呢?以為暑假可以免費美國遊學,不惜深入土共社團虎穴面試,豈知被拍片放上網「揚晒」,年紀輕輕呢一課、代價太沉重,會唔會隨時連「豪遊」都攞唔到呢?

陰功過陰功小野豬被包圍。

騙徒手法層出不窮,各位,坐穩。

 

作者簡介:作為一個香港人,時刻發揮厚多士精神,生活上眼見怪事、錯事、愈來愈過份,一於插到佢暈!Never be afraid to say what you feel - You can only die once.

發表意見