立場新聞 Stand News

街霸 Agent Smith

2018/3/7 — 12:59

地產「Agent」經紀 l 資料圖片

地產「Agent」經紀 l 資料圖片

【文:地產界小薯】

每次新盤賣樓班地產代理(agent)喺售樓處附近聚集,情況就好似 Matrix一樣,一班西裝友Agent Smith圍你想sell你買樓,令你寸步難行。有時通街都係「準」,有可能樓盤真係筍,或者發展商俾佣俾得豪爽啲,亦有可能係發展商背後吹雞谷人氣營造效果,形成萬人空巷嘅感覺。佢地基本上乜人都圍,尤其係做世界盤,有殺錯無放過,好似通街嘅人都可以隨時攞幾百萬出嚟做首期,買樓好似買棵菜咁。行內統稱呢班人為「街霸」。

好多叻仔嘅「準」一早call到客就唔駛喺條街等運到啦。呢批「街霸」通常都係啲散仔,好多都係初出茅廬,有時仲有啲師奶阿嬸添,真係乜人都有。無辦法,地產代理門檻太低,只要中五畢業同無犯過法,再考埋個牌就搞掂。有時啲「街霸」真係要執執佢,唔喺著左老西就係pro。作為一個樓盤Sale屎、一個促成幾千萬幾百萬交易嘅人,你嗰死𡃁仔頭又唔梳、衣衫不整、條褲又吊腳、仲要揸住張梅菜咁霉嘅樓盤leaflet,一嘢隊俾啲客,做得成生意都奇啦。

廣告

「街霸」無所不用其極,除咗喺行人路揾客,佢哋藝高人膽大,喺附近嘅馬路仲會追車添。閒閒哋追幾條馬路,人哋落車就圍住人,試過有啲誇到成個人趴喺車頭。唔係淨係班男人咁大膽,有啲𡃁妹仔著住斗零踭都照追車。都明嘅,有車即係有啲米啦,仲要喺附近出現,好大機會係潛在客戶。佢哋搏晒老命都係為隻佣啫,有啲可能全年食緊白果,食粥食飯睇今次。貴啲嘅樓隻佣可能真係夠個代理全年洗㗎。

作為發展商嘅小員工,啲 「街霸」又未必認得你(就算你係揸盤人,都會有傻仔唔認得你),當你要去售樓處,喺路上除非你著制服, 佢地都係一班人湧埋嚟sell你。你嘅員工證就會成為你嘅擋箭牌, 再加埋講句「我係XX員工」,你就可以變成Matrix嗰Neo 咁,班Agent Smith會自動彈開,你尤如有一個無形嘅力場保護一樣。   

廣告

班「街霸」爭客打交好可能係發展商暗地裡最期待嘅畫面。打得交即係爭崩頭,啲單位搶爆,實係紅盤啦!其實就唔驚嘅,EAA成日派人在場幫手維持秩序,最多咪揾「食蕉」去拆,再唔係報警囉 。總之唔係搞到發展商自己友,唔係太大鑊,班發展商同事日以繼夜係樓廠又悶悶地,咪當睇下MMA無咁悶。

 

作者簡介:如筆名,我係地產界嘅Small Potato,喺發展商打滾左一段時間,對呢個行業有一定認識,行內結識唔少朋友,聽咗好多八卦嘢。我專寫行內gossip同分享行內知識同經驗,令更多人對呢行有更深嘅了解。

作者 facebook page 

發表意見