立場新聞 Stand News

被強積的香港

2017/11/2 — 14:02

近日政府為左推人買樓托高樓價,已經無所不用其極,早前就話公屋供應封頂,最新就話會研究可以拎強積金做首置,釋放大家嘅「老本」進貢地產市場。

呢個行為其實證明左一樣野,就係對政府黎講,強積金嘅概念根本同退休安老可以係完全冇關,強積金嘅目標就係「強積」本身,要俾人強制囤積你手上嘅錢一大段時間,剝奪你自己行使財富嘅各種自由,話幫你儲錢根本只係一個藉口,唔係根本就唔會俾你將棺材本都轉移去做房屋投資。

而買樓明乎其實都係一種「強積」嘅變種,尤其買綠置居同首置樓,逼你借20-30年一半人生供你半份糧,最後俾你好彩無風無險供完個物業都唔知升左定跌左,睇著個樓市息口就好似睇著份強積金月結單咁無助,臨老拎番間樓出黎做逆按揭每個月都唔知按得番幾多,最後好可能俾金融地產霸權玩足一世。

廣告

好多人問我你地做土地房屋研究,有冇地產商lobby我地,我答冇佢地唔信。其實好易理解,依家所有土地房屋政策最大得益者都係地產商,佢地有香港名義上最話得事個位幫佢defend所有野,佢地連明益地產商嘅公私合營都幫佢地講成為政府嘅「一貫做法」,咁神通廣大,重駛鬼lobby我地啲民間研究組織?

有啲人話林鄭係坡粉中左坡毒,成日抄新加坡嘅政策黎用,但係我覺得佢最虛偽嘅地方,就係人地新加坡每年8-9成政府地都係用黎起公營房屋,相比香港每年得3-4成地做公營,又唔見你敢公地公用拎多啲賣地表嘅地放番入去起公屋?

廣告

葉公好龍得個講,借人地過橋,講錯左要道歉但政策照舊,壓榨啲基層後生又話重視佢地嘅聲音,拎埋你老本等你恐懼臨老無助要自甘剝削努力打工。但仍然有好多人睇唔到,依家香港嘅房地同財金呢種「被強積」嘅思維,正不斷對普通市民製造緊巨大嘅生活壓迫,而亦都唔似有迫爆嘅跡象,所以啲官員先可以咁肆無忌憚。

 

作者 facebook

發表意見