立場新聞 Stand News

記性

2015/8/21 — 10:18

圖片來源:維基百科

圖片來源:維基百科

做廉署記性差,係好大鑊嘅。

首先,俾你過五關斬六將獲聘,接著要面對壓力沉重的入職訓練課程。實習考核一浪接一浪,《防止賄賂條例》、《廉政公署條例》、《選舉(舞弊及非法行為)條例》……雖然未至於「調轉頭都識背」,但確需要背到滾瓜爛熟,否則考試寫不出艱澀的英文法律條文,好容易肥佬甚至被革扯。

好嘞,俾你出到班去到Section,開始調查生涯,枱頭會有大堆File,要逐單睇,做筆記,投訴人背景,指控是甚麼,各證人的口供,疑犯(可能多個)的角色分工,牽涉的公司名稱、交易詳情、金額……複雜過TVB的多角戀情節。做得Case Officer,就要盡快睇熟File,因為大Sir可能隨時隨地call你,問你1134單case,阿陳同阿林上次喺邊度Gathering。嗱!呢個Gathering問題其實唔易答,首先你要記得1134係你手頭上十幾單案邊單先,然後入面可能有兩個阿陳,你要知大Sir講緊邊個,跟住你要即時而肯定回答。你以為答到就甩身?咁你就錯啦,大Sir再追問佢兩個點相識?你可以唔知親生父母點樣相識,然後生你出嚟,但你必須要知,或者要想盡辦法知佢地點識囉。

廣告

你可能心諗,佢地點識唔係好關事喎,但大Sir做得大Sir,佢當然經驗、智慧和能力過人,必然有更全面而深入的考慮啦!關唔關事唔係你決定嘅,Need To Know嘛,大Sir問咩就要答咩啦,如果佢要你知,就會話你知,唔使問咁多「點解嘅?點解嘅?」

如果你記性差,咁就「大檸樂」,你嗰CI阿頭(總調查主任)突然叫你攞埋3373嗰File一齊見PI(首席調查主任),入到PI間大房畀佢係咁捽,你一味答「唔記得」、「要check check」、「唔清楚」,你會見到CI的面色由紅轉青,再由青轉黑,那種自然流露的內心交戰,就算謝賢加曾江加胡楓都未必演得來。

原刊於AM730

廣告

發表意見