立場新聞 Stand News

記者捉低頭族唔讓座:唔好玩啦

2015/8/21 — 11:21

《調查指「低頭族」成拒讓座主因 記者直擊青年玩手機未讓座予抱孩婦女》一文 ( 明報網站截圖 )

《調查指「低頭族」成拒讓座主因 記者直擊青年玩手機未讓座予抱孩婦女》一文 ( 明報網站截圖 )

是咁的,夜麻麻有個即時新聞,標題係《調查指「低頭族」成拒讓座主因 記者直擊青年玩手機未讓座予抱孩婦女》(連結),個內文係講記者響地鐵影低頭族冇讓座俾個抱細路嘅女人時,有乘客發火。

1. 先講明一下,我成日抱住兩歲阿女搭車,如果有人讓座俾我或者太太,我地會非常感激。印象中響電車上面有人讓座機會率係8成,地鐵港島線係5-6成(其他地線少搭,唔肯定)。我自己就唔太介意其他人冇讓座俾抱住阿女嘅我,不過如果見有孕婦、老人或傷健人士而有人唔讓座/唔讓地鐵升降機位,我會出聲叫有位嘅人讓,試過見住個月台啲健全嘅人湧入部升降機,但個坐輪椅嘅老人冇人讓俾佢入,我叫都冇人讓,就真係發火鬧佢地無公德心。

2. 抱住細路應唔應該得到讓座,其實同抱住個小朋友年齡有好大關係。如果有人抱住初生BB,你唔讓的話,個大人真係好辛苦,如果跌倒真係好大鑊。但圖中呢個細路,目測都應該有五歲或以上,牛龜咁大件,其實真係應該要佢企下,而唔係要個阿媽抱住瞓(退一百步:除非個細路病咗)。

廣告

3. 我本身好反對影人冇讓座然後公開相片俾人圍插。人地冇讓座,你係咪開咗聲叫佢讓都唔讓?你係咪肯定佢冇特別需要要坐?如果唔係,你放張相上網吸引人圍插係咪真係對被影嘅人公平?

4. 記者係想捉低頭族冇讓座,都唔該搵個合理啲嘅case。你用快門有聲嘅相機影人,即係用單反(至少係換鏡機),係快門有聲嘅單反呀大哥,正常人坐緊車無情情俾人用單反對住嚟影,唔扯火就奇,記者點會唔知?

廣告

5. 咁樣報導,係咪覺得個記者好有道理?唔好玩啦。

 

 

原刊於作者博客

發表意見