立場新聞 Stand News

誰最需要被發展?

2015/8/23 — 16:47

新界東北發展。
你慶幸自己住市區,就算燒咗成個東北都燒唔到你嗰疊。

山頂盧吉道發展酒店。
你慶幸自己無錢住半山,話之佢山頂塞爆。

起高鐵拆菜園村。
「菜園」?乜香港仲有㗎咩?

廣告

高鐵工程泥漿湧入米埔濕地。
「米埔」?唔係小朋友旅行先會去㗎咩?

起三跑、港珠澳大橋,頻危的中華白海豚幾近絕跡。
你問:中華白海豚?幾錢條?食得㗎?

廣告

南生圍發展。
你諗:TVB拍劇少咗個景點囉!無所謂啦,反正而家都係播大陸劇咋嘛。

郊野公園發展。
你話:發展好吖!反正我都唔鍾意行山。

傳統老店被領匯、名店、金舖、化妝品店、藥房淘汰。
你阿Q地說:舊嘅唔去,新嘅唔嚟嘛。

囍帖街活化。
你話:有幾可要做囍帖先?就算要,淘寶咪得囉。

觀塘﹑深水埗舊區重建,通通換上屏風樓。
你諗:窮人住得熱D辛苦D,好正常啫,開冷氣囉!

旺角波鞋街重建。
你有D唔開心,但豁達地想:大不了買少對波鞋囉!

般咸道老樹被斬。
你怪人小題大做:家吓又唔係斬人!

電車被指慢過行路,又話要拆。
你話:轉搭地鐵囉,咩jack?

活在今天的香港,正能量的確必要。
只是,對強權阿Q,其實是為官商勾結撐腰。

為上述事情護航,已令港共政權在尖東海旁公然利益輸送,甚至把前朝創立的「單一招標」進化成更高層次的「不公開招標」。逾九成半市民反對,城規會照樣通過,讓出尖東海濱逾四萬平方呎公眾用地給提名唐英年卻最後轉軚做梁粉的新世界發展活化。

四萬平方呎、尖東、海旁。香港人做一世樓奴或者有間幾百呎蝸居。地產商看風駛悝、略懂擦鞋就有四萬呎公眾用地,而且是尖東海旁 - 香港人拍拖勝地,睇煙花、睇燈飾必到之處,亦是市區僅餘可以吹吹海風的中心地段。

朋友們,這些年的洗練,大概我們已知道「發展」、「重建」和「活化」其實只是「強拆」、「迫遷」、「剝削」和「謀殺歷史」的面具。今天的香港,你唔理政治,政治也會追到你所在的每個角落。

對不公義阿Q,不但助長政權的剝削,更授權他們強拆你的回憶和感情。不是嗎?環顧你充滿成長回憶的地方,今天還有多少未被「發展」和「活化」波及?我們的家很擠迫,迫得差點我也放不下,現在連僅有的喘息空間和集體回憶,也被明張目膽地謀殺了。

以官商勾結來發展香港的如意算盤,我們怎能袖手旁觀?說到底,最需要被發展、被重建和被活化的,不就是在發展、重建和活化香港的不公義政權嗎?

發表意見