立場新聞 Stand News

談善樂堂事變 — 那些很苦很澀很痛的花生

2018/10/28 — 14:27

林國璋牧師(網絡影片截圖)

林國璋牧師(網絡影片截圖)

最近基督教的最熱門話題,除了強國強拆十架外,大概就是有關善樂堂的人事糾紛事件,要知悉詳情,可以往基督教善樂堂網頁林國璋牧師面書相關的回應聲明,睇完才大約知道事件來龍去脈。在我而言嘛,了解一番後,第一個感覺是:

1. 人哋第一任老婆過世意圖續弦(又唔是重婚乜乜乜),關教會 X 事?
2. 夠膽指控牧師有財政缺失,講多無謂,兩隻字,報警,完

其實講咁多原因,真係好煩。這種人事糾紛去到這個階段,就好像一對就離婚的夫婦咁,你呼吸都是錯㗎啦。是咩原因並不重要,而家已經是「你的存在就是錯誤」,擺呢啲理由上檯其實仲拿屎上身,花大堆時間解話。合則來不合則去,好來好去就好,而家咁搞法,雙方都是網絡公審,與小學雞向老師告發「你過咗我書檯條界」、或者小狗痾尿爭地盤的行為無分別,貽笑大方、失禮至極,仲俾一大堆花生友指三道四,成地花生殼。簡單嚟講,就是「我就是睇你唔順眼」,講咁多野唔煩呀?

廣告

在這些情況嘛,我覺得:要不、就坦誠到底,要不、就虛偽到底。坦誠到底,即是坦白在聲明中講「我就是睇你唔順眼要炒你呀?」不必搬出這樣那樣既不完整又故弄玄虛的理由,讓花生友抽秤一番;虛偽到底,即是大家好來好去,講聲「牧師榮休了,大家祝他前程似錦阿門!」就算。咁簡單的辦公室政治都唔識玩,起度學人玩權鬥?而是次事件中,涉其中的唔是牧師就是教會長執。呢班人有無做好「愛人」的榜樣?定是口中講「大愛包容」,事實卻是你唔鐘意我我又唔鐘意你?教會成日講乜大愛包容,包容咗你最睇唔順眼嗰個先啦。

我知道事件繼續發酵之下,出現了袁陳錦美師母「敦請善樂堂委託獨立調查委員會調查林國璋牧師事件」的聯署事件,以及其後續。個人而言,雖然我真心明白袁師母背後的心意(真心明白!),但事實是華人教會「家醜不出外傳」、連刑事案件都夠膽聲言「教內解決」的風氣下,「獨立調查委員會」的出現機會微乎其微。這樣的話,倒不如報警解決,教內中人亦不用拿這趟渾水上身。

廣告

最後最後,我想講作為平信徒,今次我食花生食得流著淚:這些花生很苦、很澀、很痛。教會本為一體,現在卻因信徒的罪性而四分五裂 — 一次又一次的鞭打耶穌身體的,哼,果然就是我們吧?

最近在教會詩班,在指揮一首名為《教會一家》的詩歌,願歌詞僅為寄語。「願獻奉我生命,在教會作肢體,沒有私見驕橫,盡我生榮耀基督!」

教會一家

願愛護勝兄弟,大眾又似身體,沒有手腳不行,沒有口,沉默無聲。
共暢聚勝姊妹,大眾又似屋宇,沒有磚瓦不行,沒有窗誰住這裡?

恩賜須運用,要多方建立信徒;彼此用愛心分享主裡各樣恩典。

願愛護眾兄弟,大眾或有差距,沒有偏見分歧,願挽手,齊步同心。
願獻奉我生命,在教會作肢體,沒有私見驕橫,盡我生榮耀基督!

發表意見