立場新聞 Stand News

請管理好你的反芻思考

2019/1/21 — 10:01

最近看了一本由李介文臨床心理師寫的「反芻思考」。買來看,是因為一位好友提過,他每逢考慮不周,就會「反芻」三幾日:自責為何沒有做得更好、為何沒有想到事情會這樣發生、為何沒有諒解對方難處 ....。

我剛剛相反,每逢考慮不周,畀人質問我點解「諗唔到」,我都會答「諗唔到」係一個現象,無得解。考試有特定範圍我都未攞過滿分,點解在職場就要乜都諗到?職場上,好多時要多方都犯錯才會出事,而犯錯本身也很平常。問題是我認了錯,其他人卻唔肯認,所以我會講:「我唔Q得閒理你有無錯,我淨係要知你肯唔肯同我一齊搞番掂佢」。我諗你睇到呢度都知我衰到無朋友!

讀此書有意外收穫。作者話當一個人生活受阻,大腦就會去搵原因,但情緒會主導,推論會過於簡單,會將責任「全部」推給自己或別人。這觀點解釋了一些「職場怪現象」:

廣告

責任全部推給自己 — 好多 junior staff 被反芻思考操控,凡事就把責任全部推給自己(呢次實入我數),還會把事情災難化(老細實寫死我)和標籤化(班友背後實唱我廢柴)。由於感覺太恐怖,他們很怕犯錯:怕到不敢分析、只敢陳述;不肯提意見、只肯聽指示;不願上報危機、只願不會爆鑊;不信上級公平處事、只信有錯搵佢祭旗。其實是自己嚇自己,以致無法面對和管理好反芻思考,令事情變得 self-fulfilling,最後上級真的會覺得他們無信心、無sense、無鬼用。

責任全部推給別人 — 好多 senior staff 被反芻思考扭曲。佢哋乜都 seek your inputs (=問過你啦), FYI(=你知㗎),other views welcome (=你無反對喎)。另一招就係提出好多問題,等你笨人出口話無問題,第日出事時就賴你。第三招係無限擴大定義,當年我負責統計組,有人同我講:「呢單嘢話晒都同data有關,你無理由唔幫手?」我唯有問佢:「咁有乜嘢係同data無關嘅呢?」這些人被扭曲到真心認為:錯係人地、功係自己。他們無誘因管理好「反芻思考」,如果佢老細唔修佢,你就無佢修!

廣告

責任全部推給件事 — 更高級嘅人,個個都under佢,所以賴唔到其他部門,但可以賴地硬。他們會問:點解傳媒硬係要報導負面嘢?點解咁重要嘅point無人講過(其實係講過)?點解件事會咁發生,好不尋常?這類人太強了,他們沒有管理好反芻思考,而是消滅了它!他們高高在上,穿上皇帝新衣都唔會有人出聲,何況只係講下廢話發洩下?對於這類難答嘅問題,我會收口,等高手明撐暗擦,讓老細自Hi一番。如果自Hi過後認真處理問題,那傷害不大。但如果老細Hi爆唔收手,搞到下屬要諗計 justify 佢嘅言論,咁就好易變成 uglierbaby!

我希望我能夠繼續認錯,因為如果有一天我唔需要再認錯,我應該係香咗!

我希望做事嘅人能管理好反芻思考:不要被它操控,變成第一種人;不要被它扭曲,成為第二種人;更不要消滅它,成為第三種人。

我希望社會大眾可以容錯,尤其是無心之失和唔夠醒,因為犯錯真係人之常情,只要你肯原諒,做事嘅人就可以更專心處理問題,唔使為了解釋自己無錯而一直錯下去!

發表意見