立場新聞 Stand News

貴買賤賣

2019/3/5 — 19:56

本土研究社製圖

本土研究社製圖

專營劏房致富嘅陳茂波準備豪擲 200 億公帑入市買物業做社福設施,除咗被質疑出手太豪 — 估計平均呎價 4 萬 — 之外,市民紛紛追數問佢點解唔回購領展。但羅致光早前封哂後門,話買領展物業嘅可能性近乎零,因為領展商場提供緊市民日常所需喎。乜市民而家好滿意領展嘅管理咩?領展出名瘋狂加租趕走民生小店,而我哋仲發現,原來領展十年來出租俾社福機構嘅樓面面積比例連年下跌!

話說當初房署賣商場俾領展時,有在地契上規定領展要用優惠租金、將特定數量的樓面面積租俾非牟利機構去營運福利 、教育及社區服務。而我哋睇到過去十年嘅領展年報(註 1),領展租俾社福或教育機構的面積(註 2)、佔已出租面積嘅比例由 2008 年嘅 10.8% 遞減至 2018 年嘅 7.2%,依個分類已經唔係純粹租俾社福用途,仲會包埋幼稚園、房署辦事處等,似乎好多開喺領展商場嘅社福機構都捱唔過 #10yearschallenge 。

至於領展再轉手賣走嘅商場就更加衰,雖然新業主要受同樣嘅地契條款約束,以優惠租金租特定數量嘅樓面俾社福團體,但新業主就走法律罅,租金唔加得就大幅加管理費,變相迫遷社福團體,好多社福機構都俾新業主迫走咗喇。

廣告

講真,如果當年無賣到商場俾領展,依家政府仲洗乜煩,唔夠社福用地大可調整旗下商舖出租比例。明明房委會賣俾領匯嘅商場總共有 151 個,遍佈十八區,總零售樓面面積近 1,100 萬平方呎,係足足相等於 2017 年全港私人商業樓宇樓面面積的十份之一(註 3)。當年賤賣資產,搞到而家要問納稅人拎 200 億買返嗰區區 43 萬呎樓面?只能講早知今日,何必當初,傻仔。

 

廣告

註 1:領展歷年年報
註 2:年報內的分類是「教育/福利及配套設施」或「教育/福利、辦事處及配套設施」
註 3:香港物業報告

💰 一齊打爆波叔
本土研究社 Facebook

發表意見