立場新聞 Stand News

這個傑青真太傑

2016/10/11 — 11:00

網絡圖片

網絡圖片

其他嘢先唔好講,你睇吓個名就已經知呢個所謂十大傑青獎有咩問題。

十大傑青既然冇十個,點解要加「十大」兩個字?十大富豪可唔可以得六個?嚟我公司幫襯有十大好處,我可唔可以淨係同你講原來只得五個好處?

全香港咁多人,你揀唔到十個唔係代表你要求高,而係代表而家好少有料嘅人走去提名。

廣告

其中一名獲獎者被圍插,其實對佢有少少唔公道,因為其實佢本來都係一個好好嘅年青人榜樣。出身唔係好,靠自己雙手買到樓,仲買埋舖,供完又好未供完又好,必定算係成就。既然人哋係咁有成就,我哋咁樣批評佢,就係有少少唔公道。

不過只係少少唔公道,即係 5% 唔公道,有 95% 都係批評得好公道。

廣告

賺到錢,周圍同人講,係一件好冇腦嘅事。除非你係開賭博網站,你要話畀人聽你係捉路之神,咁你就絕對應該用買樓嚟曬你嘅命。

你係傑青喎,唔係講錢㗎嘛。買到樓就大肆宣傳,同葉朗程呢啲市儈佬買㗎靚車周圍同人曬有咩分別?不過呢個都唔係重點,而重點係,你買層咩樓咁巴閉?淺水灣?山頂道?最戇居嘅人,就係攞住一啲唔巴閉嘅嘢然後巴巴閉咁攞嚟講。

人哋補習天王林溢欣,比你後生最少十年,已經三年賺一億。你買嘅單位,人哋一炮過唔使供買三十個都可以面不改容,係面不改容呀,因為今年買完三十個,佢下年又多幾千萬,又可以買多十個。你知唔知,人哋淨係泊喺屋企嗰架唔係成日揸嘅法拉利都貴過你層樓?

得,我知,你攞傑青,唔係因為錢,係因為你做過好多社會服務。有做社會服務係好,但呢啲咁嘅社會服務,係唔係足以去到攞傑青?我答你,far from enough。我唔係質疑佢嘅善心,但社會服務呢啲嘢,要 chok 出嚟容乜易。喂,而家講緊攞傑青喎,咁易 chok 出嚟仲係傑青?最令人擔心係,如果做傑青嘅門檻只係咁,十年後個個傑青都會變晒強國富家子弟,因為佢哋會發現,原來攞獎係咁容易 manipulate 嘅事。

搞呢啲傑出獎,最怕就係有人為攞獎而做啲為攞獎嘅事。

呢個傑青話佢冇朋友,我信。因為如果佢有朋友,佢嘅朋友就唔會睇住佢改個咁嘅英文名都唔出聲。Fony 即係虛偽嘅人,你叫自己做 Fonia,係唔係要搵個 Greedia 先襯得起你?

發表意見