立場新聞 Stand News

遇強越強的一課

2019/8/7 — 10:39

示威者以煲蓋協助處理催淚煙。(金鐘,8.5 三罷,立場新聞圖片)

示威者以煲蓋協助處理催淚煙。(金鐘,8.5 三罷,立場新聞圖片)

剛剛同一位十二歲少女上完堂。

佢開始跟我上堂時得五歲,細個時係好敏感嘅小朋友,同佢講嘢要小心翼翼。一不小心,玻璃心係即碎,然後委屈地爆喊,有時真係怕咗佢。

年復年,大家無放棄大家,父母亦好明白事理,知道建立信任需要長時間。

廣告

七年過去,少女已經高我兩寸,關係進入收成期,而家無所不談。

今日佢清唱一首歌,唱得好好,於是我照直講:

廣告

「做得好好,有幾句好感動到我。」

「…噢,其實咩係感動?點解我從來未試過俾一首歌感動過?」而家好多小朋友牛高馬大,但內心依然BB。

「啊…感動係種比較深層嘅情緒。通常要多啲人生經驗、認識多啲人先會開始感受得到。感動係一種好好嘅感覺。」

「噢,我前兩日唱首歌俾另一個老師聽,佢聽完喊,又係話好感動,點解?我以為係悲傷。」

#小朋友唔係happy就係sad或angry

「其實除咗開心同悲傷,仲有數唔到咁多嘅感情,小朋友係未必明嘅。譬如你好想食雪糕,媽咪即刻俾你食,你有咩感覺?」

「開心?」

「唔。咁當你唱完一首歌,你自己知道無乜犯錯,做得好好,你會有咩感覺?」

「呃……開心?」

「唔,同有得食雪糕係咪同一種開心?」

「 ?唔同。」

「嗰種感覺,你可以話係開心,有人叫佢做『滿足』。『感動』就係開心同悲傷之外嘅另一種情緒,可以令人笑、令人喊。」

「哦,即係越大個就會遇到越多情緒?」

「係,你下年就正式踏入少年期,會突然出現好多唔同嘅情緒,係你從來未經歷過嘅,你可能會因為唔知點形容佢而覺得唔自在,到時你唔好怪自己、唔好驚,因為係正常嘅。你可以問大人,我地可以話俾你聽嗰種情緒叫做咩名,知道之後就會舒服啲。不過無論好同壞嘅情緒,都係要親身經歷過先會學到係係咩一回事。每駕馭到一種情緒,你就會長大一點。」

「學曬就變大人?」

「哈哈,可以咁講…」

佢聽得入神,喺明與唔明之間,已經長大了一點。

做咗人咁耐,呢兩個月經歷咗好多無人知叫咩名嘅感受:比憤怒更憤怒的、比悲傷更悲傷的、比無助更無助的……

每次大家擔心民意逆轉,都竟然會見到有更多估佢唔到嘅人走上前守護香港;嗰種抗爭到底嘅團結同決心似乎遇強越強。社會即使會倒退,人心卻會因為我地學識呢D或好或差嘅新感覺,而變得強大,呢樣嘢唔係乜嘢外在勢力可以控制到嘅。就好似我地年少時,被各種不知名嘅情緒折騰完之後,都會煉得更成熟、更無懼,變成今日嘅自己。只要大家繼續齊上齊落累積落去,終會贏。

原刊於作者博客作者 Facebook 專頁

發表意見