立場新聞 Stand News

選擇做一個真心對家人好的人 就要承擔結果

2018/1/17 — 14:47

家庭資料圖片 l 《葛城事件》宣傳照

家庭資料圖片 l 《葛城事件》宣傳照

朋友的故事是這樣的。

Ben屋企有三兄弟,佢排中間。三兄弟裡面,Ben讀書最叻,畢業後亦搵錢最多。Ben嘅大佬,醒目仔嚟嘅,但終日沉迷炒賣,幾年前,炒輸期指輸到仆直,老父老母將倌材才本拎晒出嚟填數,連住緊疊樓都賣埋。自此之後,Ben就負責老父老母一切生活開資,而Ben嘅大佬,則長年寄居大陸,一年都唔返落嚟一兩次香港見吓阿爸阿媽。據說,佢響上面識咗啲有勢力人仕,好似話搞緊生意喎。但搞咩生意呢?一直都冇人知。

Ben嘅細佬讀書不成,Ben嘅老父從前有間trading公司,於是大約十年前,Ben嘅細佬響大學drop out咗之後,就入咗去老父間公司都「幫手」。老父年紀大,身體唔好,呢幾年都冇辦法返工睇住間公司了,逼於無奈之下唯有一切交俾細佬打骰。但細佬份人,自細貪威識食,喜歡響朋友面前認屎認屁,卻又不學無術。間公司由細佬話事之後,營運情況當然係越嚟越差。

廣告

「CK,阿媽今朝又問我借錢。」Ben邊食住拉麵邊說話。

「借幾多?」我問。

廣告

「三百萬。」Ben說。

三百萬?我係咪聽錯?兩個老人家日常使費阿Ben已經負責晒,有乜嘢要失驚無神洗三百萬?

「細佬玩到間公司冇晒cash flow,月尾出糧都冇錢,仲話有幾張訂單要找數。」仲有呢?「大佬打電話落嚟話有生意要投資,少少地一球上下就得啦喎,叫阿媽借住嚟先。」仲有冇呢?「有,阿媽話阿爸身體唔好,有個傳銷friend話幫佢買一堆健康食品會幫到個病喎。」

大佬要投資,但唔知投資啲乜。

細佬輸晒公司啲錢,要填數。

阿媽要買傳銷。

「Ben,你今年係咪犯太歲呀…」我說:「你唔係真係俾呀?今次俾完肯定有下次㗎喎。」

「我梗係嘗試同阿媽講道理啦,但阿媽話我係衰仔,咁都唔肯幫。佢仲話我唔念親情,睇住阿爸同兄弟死都唔肯救…」

唉,好仔難做。咁多年嚟,睇住頭家嘅,係阿Ben。負責屋企所有生活費嘅,又係阿Ben。隔個禮拜陪老父去睇病嘅,都係阿Ben。阿Ben細佬離咗婚生咗個女,但細佬時時唔知去咗邊度威,幫細佬睇住個女嘅,都係阿Ben。阿Ben自己都有老婆仔女,佢係相對搵得多啲,但搵再多,都俾屋企班大帝吸乾啦。

更好笑嘅,係佢大佬同細佬,咁多年嚟乜嘢家用都冇出過,平日連探吓阿爸阿媽嘅時間都慳返。平日屋企有乜爆鑊都自動波由阿Ben處理,但阿媽卻日日鬧阿Ben係衰仔,而永遠對另外兩個仔無限包容。

「唔嬲㗎咩?偏心成咁…」我說。

「有名你叫啦,我係阿『笨』嘛。」Ben苦笑。

「老友,自古以嚟,忠臣嘅下場都係悲慘的。」我也跟著苦笑。

「你可以選擇做一個冷漠自私的人,日子會容易過一點。但你選擇了做一個真心對家人好的人,就要承擔選擇嘅結果。路係自己揀的,怨,都冇用。」

聽罷,我只能無言以對。

祝好運。

 

標題為編輯所擬;原刊於作者 facebook

發表意見