立場新聞 Stand News

醫療失誤 還是無知害死人

2017/7/25 — 12:02

資料圖片 - Lisa @ flickr — Attribution-NoDerivs 2.0 Generic (CC BY-ND 2.0)

資料圖片 - Lisa @ flickr — Attribution-NoDerivs 2.0 Generic (CC BY-ND 2.0)

【文:食物鏈底層】

一般上呼吸道感染,例如支氣管炎,醫生都唔會開抗生素(antibiotics),藥物主要都會係控制病情為主。所以大家平日有傷風感冒去睇診所醫生,都唔會有抗生素食,更加唔會有特敏福(Tamiflu) 呢類抗病毒藥(Antivirals)。

新聞中病人先被醫生處方Augmentin,五日後再被處方Tazacin。咁呢啲究竟係咩嚟呢?Augmentin係盤尼西林 (Penicillin) 類嘅抗生素,係可以用嚟治療好多種細菌引起嘅感染,例如尿道炎,中耳炎,肺炎等等,所以就會被醫生用嚟做第一線嘅抗生素(first-line antibiotics),而新聞中病人就係因為肺炎而入院,所以佢最初亦曾被處方Augmentin。而新聞提及五日後醫生處方比病人嘅Tazocin,比起Augmentin,就可以打多一種叫beta-lactamase嘅菌,臨床上病人用Augmentin都無咩效的話,醫生可能會升多一級,upgrade轉用Tazocin。不過Tazocin亦有佢嘅副作用,佢可能會影響腎功能,對於腎衰竭嘅病人,就要注意要密密睇住個腎功能指數嘅抽血報告喇。

廣告

根據報道,「病人女兒質疑院方沒有一開始便處方Tazocin,影響母親病情」,大家睇到報導,又會問,點解一開始唔用勁啲嘅Tazocin呀?咁咪實搞得掂,或者病人唔使死呢?

其實醫生開藥係有一套指引去做,而指引嘅原意係想控制細菌產生耐藥性。如果病人病徵一出現,醫生就開二線抗生素,咁病人體內細菌會產生抗藥性,長此落去,對整個社區,甚至全球都係百行而無一害。曾經聽過有個醫生咁樣嚟比喻抗生素用法,「你屋企星盤塞咗,開頭都係買啲通渠鐵線試吓先,唔得再用通渠水啦,最後先搵水喉佬。吓吓一塞就倒通渠水,條喉咪好易玩完?」其實個醫生都唔係有心用人命嚟講笑,只係個原理真係咁。亂咁開抗生素,後果好嚴重,而家愈嚟愈多超級惡菌爆發,到有一日呢個地球大規模爆發一種細菌,再無打抗生素可以打到嘅時候,就會好似返番幾百年前咁,小小事都可以致命。

廣告

筆者建議麥議員,或者可以參考醫學意見先去批評。醫生嘅臨床決定,有無疏忽,唔係一個無讀過醫,無了解過病情嘅局外人可以胡亂判斷。

希望大家唔好淨係睇新聞報導,多方面都要了解多啲呀!

 

作者簡介:公營醫療體系下食物鏈最底層,透露各種荒誕卻又每天在醫院上演的大小事。

發表意見