立場新聞 Stand News

錢同事業邊樣對我重要啲?

2018/8/29 — 16:30

最近有位朋友問我,錢同事業邊樣對我重要啲。年輕嘅時候,我以為錢同事業係分唔開嘅,有事業自然有錢,有錢都係因為有事業。咁,我呢個當日嘅少年,當然係太年輕啦。而家老啦,就知道,錢同事業,可以完全係冇關係的。

呢幾年,見到好多朋友,財富越嚟越多,但事業卻越來越走下坡。無他嘅,物業同資產瘋狂增值,令佢地嘅身家不斷澎漲;但本地嘅營商環境,卻越嚟越困難,令佢地嘅生意越縮越細。財富增加但事業縮水,讓唔少人心態變得不平衡。以往膚淺地用嚟衡量世人成功標準嘅,兩個indicator一個向上一個向下,咁我究竟係勁人定係廢人?

呢個現象,仲間接造就咗另一個情況出現,就係多咗好多所謂嘅investor。錢多咗,自然想搵出路。以前營商環境好,我喺炒賣賺到錢,第一件事就係投資番落自己盤生意度,希望將自己既心血同事業推得再高峰啲。只係現今時勢,𢱕開石仔嘅生意已經唔輪到你做,自己對自己盤生意,已經心如止水,有錢,都唔會擺落嚟啦。咁點呢?錢又多咗,又唔投資落自己度,就唯有投資落人地度囉。只係,你又係喺呢個大環境當中,佢又係喺呢個大環境裡面,大家面對嘅困難都係一L樣,除非你覺得,你投資落去嘅人比你有料同醒嘅遮,否則,你點解會覺得佢會幫你賺到你冇辦法賺到嘅錢呢?

廣告

我覺得呢個係好矛盾嘅一件事,事關近年呢班所謂investor,好多都對自己信心爆棚。要佢覺得,佢invest落去嘅人比自己醒,係極罕見嘅事。呢個心態,會間接令佢地覺得,人地做得唔夠好。另一個問題係,過去多年嘅炒賣,令佢地習慣咗錢係應該好快咁賺番嚟。當佢地以大財主佬嘅姿態,投資一啲做實業嘅生意嘅時候,佢地依然認為,錢應該係好快咁賺到返嚟。事實係點呢?佢地應該被人提醒一下,自己果盤生意點解會走下坡,實業嘅生意,由投資到回本到賺錢,係有一個漫長嘅過程。行前三步,退返兩步半係經常發生嘅事。呢班investor曾經都係生意人,曾經經歷過小步前行嘅日子,當身份轉變成財主佬嘅時候,expectation就180度轉變,我認為係愚蠢到極。買嘢,要清楚自己買咗件咩貨返嚟。買架七人van你要求佢行到好似架法拉利咁快,係On9,那管你有幾多錢喺身都係一樣。

要快,其實應該返去炒炒賣賣囉。之但係好多人又覺得,齋靠炒賣發財又唔型;咁要型,就要忍吓囉。

廣告

咁都唔明,就係死蠢㗎啦。

至於開頭嗰個問題,錢還是事業重要啲…於我而言,去到呢把年紀,一定係前者啦。而我,一向都唔要求自己有型的。

(原文無題,題為編緝所擬)

原刊於作者facebook

發表意見