立場新聞 Stand News

閱讀的美妙

2015/9/24 — 20:12

今日去圖書館,一次過還五本書,一本正到要翻睇,一本驚險刺激引人入勝,一本正經八百有深度,一本囉囉嗦嗦,一本平庸無料到。

如果大家記得,我喺星期一嘅演講入面提到,事業可唔可以成功,唔係靠天份,因為有天份嘅人根本好少,而係取決於有無機會,製造同埋把握機會嘅第一要訣,就係個人修養學問,而長期閱讀正正係提高視野識見胸襟嘅最有效方法。

閱讀有啲冒險尋寶嘅味道,讀十本書,未必撞到一本正嘅,如果有半本,已經有So,直頭開心到痺。但係唔試過,唔瞓身投入,永遠搵唔到書中嘅黃金屋,學問修養內涵就會永遠原地踏步,呢個係每一個人嘅自由選擇,無得勉強,但千祈唔好怨天尤人,覺得自己懷才不遇,撞唔到發展機會。

廣告

閱讀有時要講緣份,當有一日,你企係地鐡車廂,讀到一段精彩文字,一時控制唔到自己,咔一聲笑咗出嚟,或者眼濕濕流馬尿,側邊嘅人以為你儍咗,恭喜你,終於踏入閱讀嘅忘我境界,書本永遠會係你嘅終生朋友。我好好彩,大三暑假嗰年,已經試過因為書本情節太過令人氣憤,激動到喺街度揼咗本書,事後要賠番畀圖書館,由嗰日開始,我同書本friend到今日。

至於上面五本書,邊本正,邊本癈,留點白,不說穿了,大家各取所需,按圖索引,冒險睇吓啦,無蝕底嘅。

廣告

你會唔會與書結緣,睇你決心,睇你福份囉,不過唔好用「無時間」做藉口,祝大家好運。

提醒自己,提醒朋友,唔該些牙。

 

後記:

噚日「原來錢作怪」條短片嘅瀏覽量,已經突破三十二萬人次,真係癲咗,可以感動到咁多人,直頭嚇到我儍咗。

原刊於作者 facebook 

發表意見