立場新聞 Stand News

關於良景黑煞管理惡行,點可以搞三日都搞到不明不白?

2016/2/10 — 16:55

良景出現一幅白底紅字的橫額,指「黑管理員」阻礙當地居民生活。(圖片來源:屯門社區關注組)

良景出現一幅白底紅字的橫額,指「黑管理員」阻礙當地居民生活。(圖片來源:屯門社區關注組)

我做過物業管理公司,又做過公務員。我嘅經驗係,逢親同物業管理同執法有關嘅事,正路嚟講權責會分得好清楚。良景邨黑煞「管理員」打人呢單嘢點可能搞成咁?點解會搞到不明不白?點解個政府可以完全冇處理?

個問題要問責,只需要問呢幾條問題:

廣告

1. 黑煞「管理員」僱主係邊個?就算係外判暴力,follow the money 就知係領展定係良景立案法團(良景係租者置其屋),冇可能搞三日都不明不白。(領展話唔係佢地,即係立案法團,咁而家大家留名等管理公司同法團出嚟交代喇)

2. 黑煞封路、非法禁錮、打人嘅通道,係屬於領展、良景邨立案法團,定係政府?業權擁有者由得暴行連續三日發生,係要負上民事法律責任。(今日領展嘅聲明話唔屬於佢地)

廣告

3. 黑煞「管理員」有冇保安牌照?負責發牌嘅警務處有冇查?

4. 黑煞「管理員」造型同行為都咁似蠱惑仔,新界反黑組有冇查?

5. 領展今日聲明話班黑煞唔係佢地嘅人,封路嘅通道唔係佢地地方。就當佢地講真話,咁啲黑煞拉人入去良景街市毒打,個街市係領展地方,而家有人打到成地血,領展有冇阻止?答案係冇。

6. 有人俾黑煞管理員毆打、禁錮,警察有冇拉人?你話第一日有衝突就話反應唔切啫,咁第一日有黑煞小販嚴重衝突,你第二日點解有警察睇實?要等到打到流晒血先有警察?

7. 成件事政府絕對有責任:警務處本來就唔應該容許黑煞打人嘅事發生;良景邨應該唔係100%賣出,即係房委會都係良景邨業主之一,房委會一樣有責任。

結論:而家成件事搞到徹底城管化,政府唔執法、唔負責、唔追究,無人駕駛,又向大陸化邁進一大步。而家第三日,咁究竟政府捨得俾香港人安安樂樂過年未?

發表意見