立場新聞 Stand News

除鉛(下):源頭呢?

2015/7/27 — 17:06

【文:Joey】

公屋食水含鉛風波,房委會公屋食水質量控制問題檢討委員會主席張達棠在 DBC節目講話:提出建議時也要看看是否可行,若不可行,就沒意思。他表示:

不用国貨不是問題,全部來佬貨都可以,但會比較貴。時間又長了,inspection(檢查)樣樣也驗也沒問題,我們可以的,但變了那邊廂有30萬市民排隊(公屋),好期望,等到頸都長,你說我做多這些工作,大家安心,我要多等半年,舉例說,又是否社會能夠接受?若社會接受,我們就去做,這個有代價的呢。

廣告

不必崇洋,但要崇優:而家 d 管喉焊料邊個國家做架?驗完再同我講!

香港早於英殖民時期 1990 年代已經規定採用 UPVC lined GI pipe! 水務署明文禁止使用含鉛鐵水管:就係為要提供安全飲用食水,為的是大眾公共健康!而家今日,特區十八年,你話要用番大陸水喉?唔使檢測驗收架 ~ 「飲水施鉛」都要香港賤民「飲住先」?!

廣告

本港於2005年後落成的公共屋邨,普遍水喉改為使用銅管,而且規定燒焊物不能含鉛。到底而家食水摻鉛何來?係邊個用劣質水喉配件?邊個唔跟 tender specification 中間落格?邊個地盤監督唔睇嘢比人食水?邊個收樓唔驗水累居民集體中鉛毒遺害嬰幼兒?!

而家已知 40 個媽媽嬰幼兒血鉛超標,血鉛同位素與食水含鉛相同,科學化驗証據直指供水系統摻鉛毒!至少三名幼兒發展遲緩:邊個孭鑊?由承建商大判到 n 判,房屋署,水務局一鑊熟!你個調查委員會話:「重點不是調查及追究原因」?民主黨副主席尹兆堅答你:將尋求律師、醫生評估意見,並擬定在今個星期內成立「鉛水苦主大聯盟」計劃為所有受鉛水事件影響的屋邨居民正式追究政府和承建商責任,以及申索賠償,估計按照之前醫療失誤索償的經驗,金額可達數百萬元。告死你呀!

為咗瀨共,為咗發展商中国建築利益,乜都求撚其!梁政府大聲講的「攪好民生」喎 ~ 你班仆街人渣要香港生活倒退廿年?!

食水含鉛超標,如何追查?政府:去空置單位,查外露焊接位。
點解唔鑿有問題單位驗喉?政府:因為驗冇人住單位「唔會妨礙居民」。
Goodest logic. 而家落街担水都好妨礙,驗血驗智力都好妨礙,仲使唔使查出禍源,正本清鉛呢?!

故事時間:// 深夜街上,有個醉酒佬,低頭行來行去。
警察見到,上前問:咩事?
醉酒佬答:我跌咗屋企鎖匙。
警察好心,幫佢一齊揾,轉咗幾個圈都揾唔到。

差佬再問:你肯定喺呢度跌鎖匙?
醉酒佬答:唔知喎,呢度有街燈光猛 d 易揾丫嘛。//

下次跌鎖匙匙,香港政府教你:去街燈下面揾,光猛 d 丫嘛 ~
今日香港,又真係比個醉酒佬喺街燈底下執到抽鎖匙喎,冇死囉:仲唔係水喉佬用含鉛焊料污染食水?!

邏輯問題 1:
空置單位,水冇鉛,焊位有鉛。
有人住單位,水有鉛,焊位未驗。
咁駁位焊料含鉛,如何証明同食水滲鉛關係???

問題 2:焊接物在水管外面,如何滲入管內食水?還是水管内壁污染機會大 d?
問題 3:由天台水缸到每戶水龍頭,水係流經駁位多,定係流經水管長?係焊位污染機會大,抑或水管滲鉛機會大呢?

香港管線專業學會會長黃敬認為,水質含鉛量超標未必只有一個源頭,除焊接位有機會出問題,水管喉身、水龍頭、天台水缸磚塊,甚至環境因素亦可能導致,政府早前指是焊接位含鉛導致水質受污染是「跳快咗」,政府有需要再作驗證。

《城市論壇》討論鉛水風波,揭發事件的民主黨議員黃碧雲引述美國環保署指示,稱真正要研究銅喉管有否鉛或重金屬、以及喉管有否受污染,就要抽驗「隔夜水」或「頭啖水」,而這水須停留於相關喉管內至少6小時。

又根據德國的「飲用水測試守則」,頭啖水的測試結果非常重要,因為數據代表住戶一般開水喉可以用到的水質。要停用水 2-4 小時,再取水樣本檢測,代表單位的水喉及水龍頭的水質。再測的是停用水 4 小時後的水,這次的水代表由大廈水箱到大廈喉管的水質。
按:李妙梨

That means: 停水愈短時間而積累的重金屬,代表污染源較近住戶單位水龍頭。停水愈長時間累積的重金屬,代表污染源愈遠離住戶。既如此,應該返去住戶血鉛超標和發現鉛水單位,再驗水。

按停開水喉時間長短,取水板比較,推算滲鉛位置遠近,由天台水缸至到住戶水龍頭沿著管道逐呎揾,再沿喉管鑿牆鋸條喉出黎,檢測化驗水管內壁有冇摻鉛:驗焊接鉛,水管鉛,乜鉛物鉛,邊個同位素同水鉛血鉛最吻合呢?咁先揾到源頭,除鉛。

Lies after lies.
《蘋果》驗出啟晴邨賞晴樓及水泉澳邨食水管含鉛及致癌金屬鎘
《am730》長沙灣邨長泰樓及葵聯邨聯逸樓銅喉驗出含鉛水喉有鉛來毒你。

梁振英話:「冇証據香港喉管冇事,而中国喉管有事」
張達棠都話:「不用国貨不是問題,全部來佬貨都可以,但會比較貴,建屋時間又長了。」
係你班港豬人心無厭足,又要住平租公屋又嫌三嫌四,飲住先啦~ 唔飲鉛水,屋都冇得你住呀!冇中国建築,冇瑞安起樓,點發展經濟?!

為兒童提供安全可靠食水,係聯合國訂明基本人權!今日香港枉稱「先進經濟發達城市」,爆出集體中鉛毒已經夠衰夠仆街!梁政府仲話要「發展經濟」?我發展黎比中国建築同瑞安用摻鉛毒水喉毒焊料毒懞香港人呀?!

 

作者簡介:作為一個香港人,時刻發揮厚多士精神,生活上眼見怪事、錯事、愈來愈過份,一於插到佢暈!Never be afraid to say what you feel - You can only die once.

發表意見