立場新聞 Stand News

震驚亞洲!大學生竟然講粗口!

2015/5/4 — 10:40

嶺大音樂會表演樂隊「血汗攻闖」唱咗隻歌叫”Fxxx the Police”,周融個幫港出聲話「毀香港清譽」、新界社團聯會藍鴻震話大學有粗口歌「震驚亞洲」、何君堯話要嶺大解散學生會咁。

呢個世界,有啲嘢用粗口先至表達到神髓。幾時適合用粗口,睇場合同地點。馬恩國響立法會講”not a f_cking Chinese”,要道歉係因為呢句係unparliamentary language,個場合完全唔恰當。

警察執勤嘅時候講粗口要處分,係因為佢地係執勤緊,話時話,佔領期間俾人影到爆粗鬧人嗰啲警察,唔知有冇處分到呢?順便再問問,暗角七警,唔知拉咗未?咁駛唔駛解散警隊?

廣告

大學校園嘅搖滾音樂會有樂隊用粗口歌鬧劣跡纍纍嘅警察,算唔算場合唔適當?第一,大學校園係私人地方,大學生都係成年人,呢個rock show係成年人出入嘅私人地方活動。第二,rock show聽到粗口,其實真係唔出奇。要rock show聽唔到粗口,除非係中小學或者青少年中心搞。

咁一定有人鬧大學生講粗口就係讀屎片。Well,好多自稱Vintage年份畢業、係”We’re the best”嘅戰後嬰兒潮港大人,講到啲人響Hall度表演幾十字粗口嘅事蹟,仲係津津樂道,張婉婷套浮誇大作《玻璃之城》,仲係攞呢樣嘢當浪漫情節一部份。

廣告

如果大學校園有Rock band唱粗口會「毀香港清譽」、「震驚亞洲」,咁唔該快啲禁止《玻璃之城》DVD響市面流通。如果個亞洲咁樣俾係震驚到,你當嶺大係小學,定係亞洲人係小學生?

 

連結:

新社聯:震驚亞洲(連結

幫港出聲:毀香港清譽(連結

法政匯思:演唱歌曲含粗言穢語 不代表違《公安條例》(連結

 

原刊於作者博客

發表意見