立場新聞 Stand News

靠呢班經濟學者決定香港城市規劃?

2018/11/8 — 15:52

NOW 評論節目《時事全方位》截圖

NOW 評論節目《時事全方位》截圖

我唔理係咪大陸話要香港做個人工島攪大灣區,總之香港嘅城市發展係香港人話事,你搵幾多專家學者公關出嚟撐,都唔會阻礙到一般市民唔支持東大嶼人工島嘅理據同事實。

同你講造價成本,你搵班經濟學者出嚟聯署話填海平過棕地根本係冇意思,睇清楚你條數你搵收最貴嗰塊甲級農地去計,計到成 1,340 蚊一呎,但係有些少規劃常識嘅都知道,全港 7 成嘅農地都係乙、丙、丁級嚟,都係幾百蚊就收到,平均一定平過填海,所以佢哋話市民作大人工島成本造價,好明顯係賊喊捉賊。

同你講投資收益,你拎上萬億出嚟係一個事實,一萬億係一路香港累積既財富,可以用嚟做好多安老、社福、教育、公屋、青年嘢,亦都有更平更有效益方式造地,話你掏空係冇講錯。然後你班王于漸嘅經濟學者就話係「投資」,話賣地賣樓賣經營權可以搵番啲錢番嚟,噚日已有經濟學者姚松炎教授技術性踢爆,根本《香港 2030+》長遠短缺係得 106 萬平方米商業地,你就話賣 400 萬平方米就可以有 3,000 幾億收益,足足高估咗 3.5 倍。

廣告

然後再同你講地理,你班經濟學者話人工島近中環適合做副都市中心,發展新界離市區好遠,咁大西北嘅居民咪又係老遠出嚟市區番工?點解唔係方便啲市民番工去用新界棕地,又要攪到全港半數市民日日逼東鐵西鐵出市區?所以你哋嘅地理概念根本就係中環中心主義嘅偏見,唔係從普通市民嘅日常生活角度考慮。

所以靠呢班經濟學者決定香港城市規劃?收工啦。班經濟學者連基本嘅經濟成本效益嘅數字都未攪清楚呀,今日問嗰位撐人工島嘅經濟學者何濼生,問佢聯署前有冇睇清楚成本效益、官方估算㗎?冇聲出,Fact Check 都未做好,政府支持就跳出嚟為撐而撐,作大棕地成本、高估賣地收益、攪錯地理概念,作為生產社會知識嘅一分子,我絕對唔可以接受呢啲誤導講法影響公眾,唔係呢啲假新聞就會水銀瀉地,毒害香港。

廣告

 

(標題為編輯所擬,原刊於作者 Facebook

發表意見