立場新聞 Stand News

食相難睇 — 精算師的日與夜

2017/7/3 — 11:36

【文:紀文慧@精算思政】

我算係七十後,第二代香港人咁發達就冇我份啦。現今有一班年青人,對現今政府同商家好不滿,心裡嚮往英殖時代,樣樣有規有矩咁話。

我呢啲老海鮮呢,睇過英國佬點做嘢,就冇咁一面倒。

廣告

講得俗啲,其實邊個揸旗,都會益自己人㗎啦。唔係話我地咁就接受唔公平嘅嘢,但你食得來食相好睇啲,咁大家都冇咁嬲呀嘛。

以為我又講政治?唔係呀。

廣告

而家人人都攪創投,近日終於都聽聞有幾檔係有精算師份。咁其實係好事,以前聽聞精算師發達都係因爲做咗CEO或CFO,始終係打份工。創業之餘,俾到年輕同業有個另類榜樣,都係好事來的。

所以當有朋友仔氣沖沖咁同我話,有個幫顧客比較保單嘅app,以精算師主打做號召嘅,做啲保單比較唔係好全面,問我要唔要做啲嘢評論吓咁。我就話,首先我地係老幾,人壽保險公司嘅形象唔好係幾十年行業共孽,你出去話人怕會有反彈喎。而且做呢啲app梗係邊做邊改㗎啦,冇人做到十全十美先推出來的。私下提醒吓可以,高調批評就不必啦。畢竟保單條款都唔係咩秘密,人地攞齊哂去做比較人地有言論自由,只可以按道理去討論啦。

但近日代表個app嘅女士,仲係資深精算師,出來接受訪問,講啲嘢就好有問題。當然,你賣嘅係幫個客比較保單,都預咗你會同媒體一齊明示暗示保險公司好奸要睇清楚點點點。呢啲係標準劇本,揾食啫,犯法呀?

但佢講呢樣嘢嘅方法就好有問題,簡直係語無論次,深化大眾對保險嘅誤解。佢話:「買保險就好似入賭場,不過賭嘅唔係錢,係賭你條命、幾時病、幾時唔見嘢」吓?Excuse me? 你有冇讀過保險101?所謂保險,就係你因爲自己做緊樣嘢,無論係做生意,或者做人,無可避免地有風險,所以要做啲嘢去規避風險。而賭錢,正正係自己行入去,自己攞來的,唔關正經嘢事。道理原理完全唔同。

你係普通一個牛頭角順嫂咁諗我唔怪你,專業嘢都有淺白方法慢慢解釋。但你係資深精算師,打正招牌出來上報抓生意,你講啲咁誤導嘅嘢?咩「保險公司就好似莊家」?如果保險公司係莊家,咁駛唔駛攞賭牌?香港好多病態賭徒,賭到上哂癮傾家蕩產。嘩如果買保險好似賭錢咁,有冇人買保險買到上癮停唔到咁呀?有就大家都發達啦,仲駛個個月跑數?

跟手又話「精算師計算客戶「出事」的機會率後,會於此上再加上利潤率以釐定保費」話好似玩大細咁,賠嘅機會少過50%,因為會開圍骰咁。

咁都得?

首先用50%做例子係好誤導的。講到保險好似買大細咁,應該好容易就賠。咁佢個app主要係比較人壽呀危疾呀咁,嗰啲事情嘅發生機會 (比如過身或者生cancer) 係大概個年千分之一萬分之一個水位。同50%爭好遠。咁嘅講法,同桂神講「射十二碼一係入,一係唔入」,喺了解件事嘅機率來講係毫無幫助。

仲有,講到保險公司有利潤係同賭場的揸莊一樣,好唔合理、好無良咁。

好啦,我將上面佢句嘢改一改你就明:「澳牛嘅阿姐計算常餐「用料」的成本後,會於此上再加上利潤率以釐定餐費」。咁你敢唔敢食完澳牛個滑蛋常餐仲要去問阿姐,做咩你家吓賣嘢要有錢賺,咁我咪食唔返全部食物嘅價值,你開茶餐廳就好似開賭場咁,好無良?你敢同收銀阿姐講exactly以上對白嘅嘅,拍條片send俾精算思政,我地同收銀阿姐validate咗,我包你食一年澳牛常餐(名額一個先到先得)。

用精算師個招牌做生意唔係唔得。其實個牌有價值,證明我地都做精算嘅都係有點誠信,我地呢代總算守住上一輩精算師做落嘅專業名聲。但用嘅時候,唔該可唔可以有少少操守,唔好用啲誤導嘅講法去向市民大眾解釋?咁樣係不負責任,消費專業仝人辛苦守住嘅專業名聲。

你個app係幫個客做精明消費者,咁你出來講嘢又當人係傻仔咁誤導,自相矛盾啫。可能佢出來解釋保險都係用心良苦,出於好意但講得論盡都唔定。

大家揾食啫,唔係犯法,亦唔需要向邊個交待。

不過我自己就總懷念以前,啲人就算揾食,都會有所為,有所不為,食相都唔會太難睇咁囉。

 

相關報導

#10LifeHK

發表意見