立場新聞 Stand News

香港人有幾可探索社區小店?

2018/2/20 — 14:01

【文:艾迪】

究竟香港人有幾可會探索下自己嘅社區同小店?

我同你都係正宗嘅香港人,你話平時咁忙,日常有咩需要都會貪方便幫襯連鎖店,我完全明白嘅。

廣告

  我平時剪頭髮都係去黎自日本嘅速剪連鎖店,嘟個八達通拎單排隊,用廿分鐘等其他人剪,然後到自己就用十分鐘搞掂曬。一次禮拜六太得閒,見有成幾個月無剪頭髮,心血來潮,記起屋企隔離棟唐樓一樓有間隱世髮形屋,於是決定過去剪個靚頭。

走入門口,隨即有把中年阿叔嘅聲音叫我入去坐低,只見一個頭髮稀疏嘅阿叔正幫個後生仔剪髮。等咗十五分鐘,師傅終於搞掂,個後生仔好滿意咁望吓塊鏡,然後吹住口哨行出門口。

廣告

阿叔先叫我去洗頭位訓低,幫我沖水洗頭,先後三次落洗頭水同護髮素,途中不斷輕揉我嘅頭頸穴位,力度適中。如果佢係一個後生女師傅,我絕對唔止想做頭部按摩,而係要全身進行深度按摩。之後剪頭時,阿叔不徐不疾,好配合我想剪一個點樣嘅頭。最後埋單八十蚊,包曬洗剪吹,相當享受呢大半個鐘嘅剪髮體驗。

  剪完髮行落樓,先發現其實屋企樓下有幾間開咗好多年嘅小店,例如當鋪、米舖、舊式剪髮舖,喺我出世之前就已經喺度。一直出開街或者返屋企都好少留意呢幾間小店,甚至無入去幫襯過。平時出街食野買野,好自然會去附近嘅商場。

好多人對商場都有一種依賴,諗起衣、食、住、行就只會去連鎖店,好少會諗起身邊嘅小店。買衫去 Giordano、Bossini 或 Uniqlo;食野就梗係去麥當勞、大家樂或必勝客,用WeChat Pay或者裝個手機程式就可以做會員拎 coupon;買日常用品就去百佳或惠康,陪女朋友買護膚品就去萬寧或屈臣氏。

相反,望返一眾社區小店,的確無咁多本錢吸引多啲人去幫襯,無咁多人去,就無咁多話題,無咁多人會知道有呢啲小店。久而久之,可能好多人覺得社區嘅小店好落伍,追趕唔上呢個時代嘅潮流,但又有幾多人嘗試了解吓呢啲小店開始同繼續經營嘅原因,聽吓佢地嘅故仔?

最近上網見到有個同小店合作嘅活動,推動一種短暫性嘅「社區貨幣」,俾人喺小店分享自己嘅幸福故事,當係貨幣咁消費。我地當然可以把握機會,老作個故仔,拎住張「社區貨幣」去攞著數。而我就會嘗試當呢個係一個好好嘅話題匣子,同老闆熟客傾吓計,好好了解吓呢啲小店。最起碼,我都想聽吓個間剪髮鋪阿叔嘅故事,知道佢地呢幾十年風雨不改咁做落去嘅原因。

畢竟生命當中美好嘅事物都係好短暫,尤其喺瞬息萬變嘅香港,好多野都好快被取代,好快會喺我地嘅腦海消失。小店失去咗,就無得返轉頭。

 

作者個人簡介: 一隻流浪於本土startup既90後IT狗,鍾意踢波、行山、睇書同睇戲 ,最享受嘅時間係哩係屋企聽住歌睇書,然後欣賞imdb嘅top movies,再同個知音人暢談一番。(附以下圖片)

發表意見