立場新聞 Stand News

香港伙計 vs 國內伙計

2015/10/29 — 13:43

有個friend今年走咗上大陸做生意。上咗去大約半年之後,對國內嘅伙計「讚不絕口」,話香港嘅打工仔輸唔知幾多條街云云。

我同佢講,你上去混得耐啲之後,體會就會唔一樣㗎啦。伙計嘅嘢,日久先會見到人心,共過患難先會知道邊個係好夥伴的。風平浪靜天下太平嘅時候,你往往都會誤以為,演技最好嘅嗰位伙計,係你最值得信賴嘅同事。

*   *   *

廣告

另一個有趣嘅地方係,唔知點解,好多香港嘅老細,好喜歡去比較香港打工仔/國內打工仔,邊個嘅能力高一啲,邊個叻啲,邊個態度好啲…諸如此類。

比較高低其實有點多如,我只能認為,兩地價值觀差距極大,造就咗兩種唔同嘅員工出嚟。邊個叻啲,好大程度上唔關佢本人嘅事,而係你點去用佢。

廣告

你要揾個同你衝衝衝嘅伙計,上面肯定易揾過香港。今時今日,響國內要揾個有sense而又肯搏嘅人,唔算好難的。我個friend話,覺得呢啲大陸伙計好肯搏,態度一流,只要稍加調較,tune到同香港嘅sense接近一啲,佢地簡直就係天下無敵。

呢個我覺得係好多響大陸混得唔耐嘅人嘅誤解。上面所謂嘅「工作態度好好」、「好肯學好肯搏」,同伙計嘅「上進心」與及personal ego,基本上直接掛鉤的。當你對佢地仲有價值嘅時候,佢地會做足120分俾你,但當這個價值消退嘅時候,佢地亦會不留情面咁離開你,甚至extreme一點,背叛你。香港老闆在大陸,往往都係後知後覺,以為嗰個好似好loyal又好肯學肯摶嘅好伙計,會一直咁嘅attitude幫你做嘢,但卻唔發覺,自己能夠俾到佢嘅價值,卻一日一日咁減退,直到有一日,被狠狠背叛。

香港嘅同事,即使係有料到嘅,亦未必會做足一百分。work life balance、照顧家庭…好多不同嘅理由,另佢地做到盡,都只係得八九十分。八九十分夠未?我覺得夠贏就ok了。但香港嘅叻人,通常有個特點,就係即使要走,要另謀高就,但總會重視要好來好去。你平日對佢唔太差的話,即使你有難嘅時候,佢地也總唔會話跳船就跳船。肯共患難嘅人,比例還是有不少的。

共患難嘅代價係,風平浪靜嘅日子,佢未必會交120分俾你。但係120分重要啲,還是最患難時候嘅雪中送炭重要啲?

我落過難,我嘅答案肯定係後者。當你落難嘅時候,唔好話120分,平日肯交200分都係多鬼餘。落難嘅時候,最緊要,係仲有人肯幫你。

除非你老竇有幾百個億backup你,做生意,總會有落難嘅時候的。

 

原刊於作者 facebook

發表意見