立場新聞 Stand News

香港樓價係 95% 香港人挺起的

2019/9/11 — 17:12

資料圖片:元朗地產

資料圖片:元朗地產

金牌經紀 P 發短訊俾我,同我講話最近個市真係好淡,好悶,要唔要一齊出嚟食個飯。咁啱我中午得閒,於是快手約咗個飯局。

兩條佬出到嚟都係簡單食,P喺葵芳嗰頭,佢話樓上有兩件收租唔錯嘅兩房盤可以望吓,於是我出車特登入葵芳,求其搵咗一間酒樓坐低,中午時段,酒樓得兩成入座率,生意慘淡。

我對葵芳嘅印象其實真係冇乜,首先身邊冇咩朋友住葵芳,其次自己冇物業喺葵涌荃灣個頭,之前萬景峰都叫有望過吓,最後我都係覺得太貴買唔落手,雖然嗰時買落而家都應該賺錢。至於近期對葵芳最深刻嘅印象,就係警察會喺個站入邊射催淚彈呢一件咁痴線嘅行為。

廣告

我哋好快叫咗個午餐,加碟叉燒,開支啤酒咁樣,提一提大家,千祈唔好酒後駕駛,因為我飲完啤酒係去睇樓,請做個負責任的司機。

其實我買樓一直都係鍾情四大校網區,主要物業都係晒呢四個網入邊,非校網區以外嘅物業我好少睇,但係既然金牌經紀話抵,我俾下面佢去睇下。席間我問佢依家大陸人少咗嚟香港買樓,對佢大唔大影響,之後佢就講咗一句我覺得好霸氣嘅說話:

廣告

「香港樓價係 95% 香港人挺起的!大陸人嚟香港買樓對我來講冇分別,最緊要香港人肯買返香港樓!」

呢點對我來講其實有少少出乎意料,因為我覺得過往大陸人嚟香港掃貨嘅新聞好多,除此之外就係人民幣匯率有優勢,可以抵銷部份稅,但係 P 糾正我:「我做咁耐地產,大大話話都做咗將近 20 年,大陸客嘅單我都有做過,但係佢哋好多時候都係傾向買新樓,唔係好會買二手,香港嘅二手樓主要成交,今時今日個價位咁高,其實真係因為香港人買到呢個價位,如果靠大陸人買樓,我一早食西北風轉行啦!」

講真,以我自己為例,如果要考慮海外投資,我都係傾向買新樓,始終你唔係本地人,唔知道當地二手樓市場點樣,亦都唔清楚二手樓維修保養,買新樓基本上係解決咗好多訊息成本同矛盾。將心比己,如果我係暴發戶、有錢的大陸人,我諗我都係會買新樓。

至於葵芳果兩間屋我有冇買到?其實我覺得位置距離地鐵站太遠,但係間屋本身嘅保養同質素唔錯,我幾鍾意佢個窗向東南,望嘅景觀幾遠,但係始終我係出租為主,我會覺得近地鐵站會好好多,所以最後冇買到。

(我叫咗一碟蒸魚,條魚好明顯係唔新鮮的,小菜叫咗金銀蛋白菜仔同咖喱牛腩煲,菜好老,咖喱好稀好似水咁,牛腩冇咩肉食,碟叉燒又太瘦個汁又麻麻,有時真係唔可以賴市道差,本身你間酒樓質素做得差,真係冇得怪無客幫襯,我就唔開名了,因為我已經唔記得咗間野叫咩名,應該唔會再有下一次。)

作者提供

作者提供

作者 Facebook

發表意見