立場新聞 Stand News

香港樓市點會冧呀

2017/11/21 — 16:59

資料圖片:地產樓盤

資料圖片:地產樓盤

講樓市,一般經濟佬會拋一大堆意義不大的數字嚇你,例如3%失業率為20年嚟嘅新低;工資增長差唔多4%,扣除1.5%嘅通脹,你今年比上一年賺多咗兩個幾percent;股票市場上升,因此帶來正面財富效應;加息週期放緩,因此供樓壓力上升速度緩慢等等肺腑之言。

聽完之後,又覺得佢言之鑿鑿、說之有理,但係諗深一層,就想問吓佢喺度噏乜春。

既然數字呃唔到心水清嘅你,咁就要用定性研究(qualitative study)結果嚇一嚇你,話你知有幾多人要或想買樓。

廣告

第一,小弟身邊嘅朋友,會計師、精算師、工程師、愛情治療師,一個二個都話喺度等緊機會入市買樓。織織復織織,咁就過咗 6、7年,點知劉公子提醒咗佢哋,令佢哋醒覺,決定一年去多幾次日本鬆一鬆算q數。

但高薪厚職嘅佢哋依然想買樓,好似係。

廣告

第二,近期飯聚,半年前同你鬧樓市走勢鬧到面紅耳赤、本來一直租樓住叫『米王』嘅分析師同學,突然間話畀同我哋講喺跑馬地買咗個單位。

咦? 你唔係話租樓有得扣稅、又話租金回報率低,所以租樓『抵玩』架咩?原來係為女死、為女亡:主要都係因為個女要入小學, 買個抽籤嘅機會喎。

算啦,你有米、你勁。我有修養,過你兩棟、笑你兩嘴就算,反正事不關己、己不勞心。

點知,火燒後欄 -- 小弟自己個老婆,話自己終於做左『新.香港人』,終於唔駛再俾特別印花稅,再聽多兩句財演吹水,所以話想要買多層樓收租。

真心講:阿老婆大人,你老公飲醉酒都要跑去巴士站坐巴士返屋企,唔捨得搭的士,唔該你唔好亂嚟啦。

冇錯,這個正是反映香港樓宇市場需求及相關政策嘅混亂程度:剛需x冇水!

香港樓宇政策嘅混亂性,最需要負責嘅肯肯定就係坐喺政府總部嗰班『忽然學者』。

首先,特首,你話想幫助年青人上車。咁如果班年青人唔係靠父蔭或軟飯嘅話,要上車即係樓價要低啦。

我希望尊貴的您理解,政策層面一直都只可以從供應側著手。任何企圖由需求方著手的政策,都只不過是透過改變供應,從而去影響稀缺資源的價格,希望影響需求以至價格。

好啦,你話供應好難一時三刻變出嚟,又話唔夠人手起樓,又話要深入研究土地政策方向,我都理解。所以波叔成日笠水,間唔中又走出嚟就講埋啲唔三唔四、阿媽係女人嘅嘢嘅時侯,我就知道樓市唔會快速回落。

你唔講出嚟話畀大家聽你心裏嘅睇法,我都唔忟。但係點解你又要求積金局研究批准利用僱員嘅強積金用作首置安排呢?

根據小弟嘅愚見,成件事真係本末倒置之餘,仲要係白痴無極限。

本末倒置嘅係,強積金的成立,主要就係希望員工可以喺退休之後有所保障。你叫佢掘咗成嚿強積金出嚟,咁保障啲乜呢?即係難聽啲講句,佢一日唔死都要我(納稅人)養佢呀?

同時,這政策實在是鼓吹買樓,真係唔想比人話你官商勾結都幾難。

白痴嘅係,一個年輕人,當佢做咗十年嘢 算佢高薪厚職,一開波就人工超過 $30,000,即係每年MPF 戶口增加$36,000資產,俾埋超現實嘅每年5%實質複合增長,十年後MPF總資產值大約是$540,000。

唔好計其他存款,試問下,喺現時樓價高企的情況下,咁嘅金額對買樓又有乜特別幫助呢?

噚日睇新聞,見到政府話要開多個首長級的首席經濟主任(依家已經有五個)。唔講唔知,原來要多花兩球嘢一年(相信好多私人機構嘅econ佬都眼突),同外國搞競爭力排名嘅機構搞好啲關係喎。唔怪得葉劉都㷫過焫雞啦!

我哋嘅政府養住一班咁犀利嘅公務員,個個高薪厚職、有樓揸手,同時主宰我哋經濟及政策研究,香港樓市應該真係冇得跌。

計我話,政府並不是善堂,錢並不應該亂花。決策者不如好好地實事求是,請一啲有市場經驗、貼地啲嘅人,搞好啲經濟民生政策!

初試啼聲, 個人比較忟憎,希望大家唔好見怪。

 

發表意見