立場新聞 Stand News

麻疹旺季易中招 旅遊十戒你要知

2018/4/28 — 16:18

作者博客圖片

作者博客圖片

每年三至五月係麻疹Measles 傳統周期「旺季」,呢個時候麻疹個案都會突然間炒起 , 主要係因為多咗人去麻疹發病率比較多的地方渡假,好似泰國、馬來西亞、印尼,以及部分歐洲國家等。

麻疹可以經空氣及飛沫傳染係咩意思?

三月初一位台灣的年輕朋友,因為去泰國旅游 (3月1至4日),感染麻疹並於3月14日先發燒,然後於15 、16日就醫。期間曾乘搭大眾公共交通工具。由於以為係普通感冒,於17日帶病去日本沖繩玩咗十日。期間曾在日本租車、坐火車、觀光、購物及求診,其後26日返台灣後就醫,3月29日確診。

廣告

一宗旅遊相關個案,在沖繩及台灣,至今令到超過80人受到感染, 包括曾經「共享」空間及飛沫的旅遊同行者、空中服務員、 同機一齊去沖繩的乘客、同車者、同日同時同地求醫的其他病人等,呢班「無辜」的人,好多同呢位台灣朋友根本唔識,就係因為同佢曾經擦身而過,就感染到麻疹,可以見到麻疹傳染力有幾高。

幾多歲最易「中招」?

廣告

根據沖繩縣的74宗病例詳細列表,中招者年齡分布:
未滿1歲:3個
1至19歲:17個
20至40歲最多,有41個
40至49歲:10個
50幾歲:3個
無病例係60歲或以上

同樣在台灣至今的24宗麻疹病例 (17本地 + 7宗境外傳入),病者的年齡全部介乎20至40幾歲。

沖繩政府公佈的成年人病例,大部分對麻疹缺乏免疫,多數無打過麻疹針、唔知有冇打,或者只係打過一針。

台灣疾病管制署無公布24宗病例有冇打過疫苗, 但係指出在台灣20至40歲的人士,有相當比例 (約三成)沒有麻疹免疫。即係話,如果你對麻疹冇免疫,旅游期間同人「共享」空間或者飛沫就有機會中招。

麻疹唔係講玩

歐盟疾控中心呢個星期公布,舊年歐洲多國出現麻疹爆發,病例有成1萬5千宗,其中羅馬尼亞、希臘、意大利係重災區。近年在歐盟國家爆發的麻疹,平均約700宗就有一宗兒童死亡,去年的爆發,更達到每400宗有1宗死亡。 其中發病及死亡最重災區是1歲以下的兒童。

治療麻疹,暫時冇特效藥。缺乏免疫力的成年人一旦感染麻疹,病情可以相當嚴重,不少個案需要入ICU同埋插喉用呼吸機保命。好似2014年在北京的爆發, 需要入院的成年人個案,十個就有兩個出現肺炎併發症。就算好得返都唔代表無後顧之憂,因為麻疹病毒會抑壓身體的免疫系統,病人好返後會有一段長的時間,身體較容易受到其他病菌的感染。

旅遊醫學有十戒,利己亦要顧及其他人。記得、記得、記得,洗手、洗手、洗手。仲有……

病咗,唔好勉強去旅行;
病咗,唔好對住人哋咳同打乞嚏, 外出要戴口罩以免病毒人傳人;
病咗,唔好隱瞞出境旅遊紀錄。

想特別一提,局長話政府有足夠麻疹疫苗。 在醫管局及衛生署工作的同事,有需要補打麻疹疫苗的話, 可以打去staff clinic, 免費打的。大學的職員診所應該都有貨。
  
相關資料
24.4.2018 台灣疾病管制署  https://goo.gl/hN6dnN
2018.3.9 麻疹旺季仍在繼續,4個歐盟國家有兒童死亡 https://goo.gl/JMMUbj
2018.4世衛就麻疹「旺季」、「旺區」之相關公佈 https://goo.gl/FKTdtr

發佈日期: 28.4.2018   最後更新日期: 28.4.2018

原刊於作者博客文章

發表意見