立場新聞 Stand News

點先叫大快人心?上水有個故事 教訓我地要點樣奉還背信嘅人

2016/11/17 — 17:56

受訪者羅先生去新店時,水貨客迫滿街頭,正好在樓梯前執貨。羅先生呵斥對方拿走貨品,才能覓路而上。

受訪者羅先生去新店時,水貨客迫滿街頭,正好在樓梯前執貨。羅先生呵斥對方拿走貨品,才能覓路而上。

【文、圖:朝雲】

17/11 上水

話俾你聽,咩先叫做大快人心。

廣告

最近報紙電視,都反覆講「大快人心」。聞者卻未必快慰,更感孤憤。早知今日,當年又點肯答允?米已成炊,勢不如人,真係要逆來順受,死啃?

上水有一個故事,教訓我地要點樣奉還背信嘅人。

廣告

***

問:點解樓下理髮店會接手你間舖?

羅先生:其實地下同樓上嘅租約,都係 11 月 14 號完結,15 號交吉。有藥房用 15 萬租哂地舖同閣樓。

我就馬上搬舖;但理髮舖同藥房傾好,分租番閣樓俾佢。

我咪話有咩想留低,傾吓價錢囉。我只會拆走兩部冷氣,for 新舖自己用*。唔係貪心唔係為難,我只係攞需要用既嘢。

(註:筆者在新店訪問羅先生,的確如他所言)

拆前(網上圖片)

拆前(網上圖片)

拆後(網上圖片)

拆後(網上圖片)

我嘅 offer 就係三萬加攞番兩部冷氣。香姐(理髮店老闆娘)話「咁貴架,我諗住幾千蚊咋。」我同佢解釋,就當其他嘢都唔值錢,剩計新電箱就唔止三萬。

我仲保證一定俾埋最後一期電費。扣埋依筆尾數,其實唔駛三萬。第二日我打電話俾佢(香姐),佢話考慮好,三萬蚊冇問題。

我同佢一齊上樓,問佢有咩要,有咩要我清走。我剩係要兩部冷氣,其他都可以留。

我問過佢寫返張紙,佢話要等 15 號。我忙緊搬舖,冇諗過乜嘢,後來先覺唔對路,15 號交鎖匙(給業主),佢唔找數俾我,奈佢唔何嗰喎。

12 號我同香姐講,你都要搬嘢上去,我先俾鎖匙你,你順便找埋條數俾我。佢話「冇問題」。

13 號中午,香姐見我啲師傅過嚟,仲同我講「呀羅生唔好拆嘢走喎。」我話得喇,剩係搬冷氣啫。佢話未有錢,老公夜啲先俾我。

夜晚我返去清手尾,佢搬老公出嚟反口,「羅生我地考慮過喇,你啲裝修唔啱我地用,你鍾意就拆哂佢,我地唔要喇。」

我咪同佢講:「O~K~」

之後發生嘅事,大家都知道。

有點想澄清番。有人話我放上網,係咪想搵免費勞工。我重申強調一次,post 出嚟嘅時候,已經拆左七成;片段見到嘅人都係我老友。

最後佢地要由頭裝修,肯定唔見好多錢,肯定唔止三萬。佢地諗住直接搬上去做生意,而家起碼要到十二月中先開得番。

***

受訪者羅先生(背景為已拆卸的上水舊店)

受訪者羅先生(背景為已拆卸的上水舊店)

問:你肯定對方是「新香港人」?會否錯誤地針對中國人或新移民?

羅先生:好坦白講,係因為上水嘅變化而有感而發。

因為見佢地用大陸式嘅招牌、同佢地平時接觸嘅人,都 keep 住用普通話。佢地可能係香港人,唔排除我誤會。

***

問:你對上水嘅變化有咩感受?

羅先生:我係 2000 年開始做網吧,亦住係上水。

我自己都做生意,唔會怪上水傾斜左,變哂藥房。好老實講冇辦法,有本錢做生意,都會去有錢賺嘅地方,佢地冇錯。

諗深啲,其實大家唔係討厭藥房,係討厭嗰啲客;唔係討厭佢地買嘢,係討厭佢地執貨霸住條街,執完貨將垃圾周圍扔,阻住人好似奉旨咁。

轉變一定有,唔可以抗拒。但政府有需要教導遊客--既然政府認為佢地係遊客--應該點做。話俾佢地聽香港人有咩要求,就唔駛爭執。唔好隨地吐痰、唔好亂拋垃圾、唔好留低煙頭、排隊。。。守規距。

 

原刊於作者 facebook;標題為編輯所擬。

發表意見