立場新聞 Stand News

2016 怪談之見工

2016/6/16 — 17:01

日本廣告〈夏帆 ウイダーinゼリー『就活卓球』篇〉截圖

日本廣告〈夏帆 ウイダーinゼリー『就活卓球』篇〉截圖

剛踏入6月,又是另一年廣告公司招聘暑期工的季節。

仍記得以前都寫過前來見工的畢業生或實習生的一些難以想像的趣事、如何估佢唔到的奇聞。去年有位以為自己懂讀心術的小鮮肉,今年才剛開始面試兩星期就碰上一些「極品」,也就跟大家分享分享吧。

有位美國名牌大學讀工管的三年級男同學來應徵,樣子一看便知道是ABC,坐下來面試的第一件事、說的第一句話,你知道是甚麼?我相信就讓你估十次、廿次你也無可能估到。他在自我介紹之前很casual地說:「我仲有個friend喺外面reception,佢陪我來,你一陣可唔可以見埋佢?」除了360度反眼,險些從椅子直掉地上,還可以怎樣?心想:到底是你來應徵還是你個friend呢?話晒都看過你張CV用心揀過下才叫你上來interview。竟然把interview視作可以如此即興,就像去海洋公園般享受「二人同行,一人免費入場」?今日是你生日嗎?實在厲害!

廣告

另一位美少女,答問環節因無甚麼可取故此省略該部份。她的特色在於接近尾聲時反開出的一連串條件,比有些私人貸款的T&C更長、更不合理(通常都是出晒面保障甲方,這裏即是前來見工的這位美少女啦!)她提醒我:「我7月4號可以返工,但7月中要陪媽咪去歐洲旅行個半星期,因為已plan晒買咗機票book埋酒店,所以改唔到。8月最尾個星期要提早回學校出席有關秋季交流團的會議,所以呢,last day最遲係8月19號,仲有……」咪住先!由7月初起計,所有上班日子加起來都唔夠30日,返來做乜?我想問問,這份工,到底是你請我,還是我請你呢?

又有一次,來見工的大學實習生,在面試途中,不斷buffering,就如wifi網絡突然唔夠快,我問她為何想入廣告公司?她說:「因為廣告……成日……有新鮮……」臉色由蒼白,如卡通片般,三秒間變成火紅。生怕她暈倒在會議室,只好安慰她,斟了杯水給她。到最後送她離開時仲話:「下次有機會再傾過。」其實我想講:不如你換咗間寬頻網路供應商啦,以後去片,咪唔會再講下又停下囉!

廣告

發表意見