立場新聞 Stand News

2021年,政府向住家繁殖發牌的五年後……

2016/5/12 — 15:08

作者提供圖片

作者提供圖片

食完飯,照舊拖我隻唐狗仔落街散步。經過垃圾站,見到垃圾堆中有個背心膠袋,個膠袋口好似有啲嘢郁郁下,我埋去望望,哦…原來又係一隻狗BB,應該出世冇耐,隻狗成身軟賴賴,流住兩行鼻涕,四隻腳都彎彎曲曲。肯定又係附近住家繁殖出來嘅次貨啦。呢個月都不知第幾隻?!

五年前,自從漁護署強行推出139B嘅修訂,向住家繁殖發牌之後,呢幾年來,喺垃圾站呀街邊呀見過無數咁多嘅貓狗俾人掉出街。有啲死咗有啲未死,有老狗有bb。我見隻狗b仲算有啲精神,即管帶咗去附近獸醫診所睇下,不過近年獸醫診所旺到好似街市一樣,佢地淨係打預防針都打唔切。稍為麻煩嘅症,好多獸醫都寧願你「拍」咗隻動物算數。冇辦法啦,自從住家繁殖合法化以後,寵物嘅價錢平咗幾乎一半,繁殖商又係網上賣哂廣告,買隻狗仔玩下係大潮流,已經好少人好似我咁老土去領養唐狗!

獸醫見到我隻狗b,第一句問:「你買之前冇睇清楚嘅咩?政府有教你地消費者要驗貨嘛!咁唔小心㗎!我寫張醫生紙你拎返去換啦!」我話「隻狗係執㗎!」醫生好愕然咁「下?」咗一聲,然後好快咁建議我安樂死。「你想養細狗去街口樓上果間新開嘅迷你狗狗樂園啦!」

廣告

我一早預咗係咁嘅結果,又忍唔住多口問:「其實隻狗係咩品種?」醫生:「嗯…貴婦溝松鼠掛,而家好興。不過唔緊要啦,呢啲都係玩下啫,通常咁配法隻狗都好短命,咁兩三年又會興另一種啦,到時咪換囉。」

冇錯,漁護署發嘅繁殖牌真係好搞鬼,攞牌又唔使考試,而配種又冇限制,餐ABCD餐蛋腸蛋餐腸腿腸你鍾意點配搭都得。八哥溝芝娃娃又得,貴婦溝哥基又有。近年就有越配越細嘅趨勢,因為香港好多地方都限制養狗,好多人想偷雞養,果啲「茶杯貴婦」「茶杯芝娃娃」就最受歡迎。住家繁殖睇錢份上,投其所好,為咗吸引客人,有幾細隻就BREED到幾細隻。出世後基因出咗問題,賣唔去咪掉囉,計咗入成本啦!

廣告

我屋企以前住深水埗,其實法例未通過前,附近都有啲地方偷偷摸摸進行私人住家繁殖嘅。有時見到人來搵寵物,佢哋會半推半就話動物唔係賣㗎,係領養㗎。但幾年前開始,連我住嘅舊唐樓有一半單位以上變咗做私人繁殖,以前本來係一樓一鳳嘅地方而家變咗一樓一狗,而且係堂堂正正喺門口貼埋牌照號碼,貼哂靚相賣哂廣告。

我有投訴過隔離嘅住家繁殖,臭過樓下公廁,動物慘過住地獄,搞咗半年,後來漁護署吊銷咗佢個牌,罰咗幾千元。點知冇幾耐場主又返泥同一地方又繁殖狗BB,原來佢求其搵個friend申請過另一個牌。車!原來牌照費不過幾千蚊,仲係無上限任發,手續簡單,一家人輪住申請,攞牌快過你釘牌。

我後來忍唔住要搬啦,搬到觀塘一座私人樓。點知住冇耐隔籬又搬咗個新鄰居來又係做住家繁殖,不過呢個就冇咁烏煙瘴氣。我入去同佢搭下訕,場主如數家珍咁講佢嘅生意經,私繁點樣無本生利,一隻狗公四隻狗乸就攞個A牌,一年加埋八胎共五十隻狗BB,每隻賣1500已經75000,支出都係濕濕碎嘅下欄錢。POST上網一陣就清貨。佢已準備加多幾隻狗乸攞個B牌,發大來做!我問一隻狗公怎可能應付八隻狗乸呀?他指一指狗籠旁邊一大堆藥,我心都寒埋!望住呢班長期食「偉哥」嘅狗狗,又望望旁邊一班生仔機器,一時間都講唔出邊個慘啲?!!

我問佢咁樣做唔違規咩?「漁護署邊有人手巡查呀?!全港幾千家住家繁殖。即使有人投訴,私人地方漁記又唔入得,要查又要預約,到時清下太平地咪得囉!我又想問……佢即刻話:「你問咁多做乜?你又想做私繁?」

我想落街靜靜,諗緊如果公司裁員,我係咪應該轉行做私繁。我拖住我隻唐狗仔落街,為免自招煩惱,我嘅walk dog路線會盡量避開垃圾站……

 

(以上故事,純屬常理推斷,雖尚未屬實,但不中亦不遠。五年後的情況若更差,實為香港動物的不幸!贊成139b嘅人,醒下啦!)

原刊於am730作者facebook

發表意見