立場新聞 Stand News

67 歲拾荒黃婆婆:可唔可以令我哋晚年過得有尊嚴?

2019/4/2 — 15:55

黃月嫻(立法會片段截圖)

黃月嫻(立法會片段截圖)

(編按:立法會福利事務委員會今日(4 月 2 日)召開特別會議,聽取出席人士及團體對本港貧窮情況的意見。67 歲拾荒者黃月嫻婆婆向勞福局局長羅致光哭訴求職苦況,希望政府改善長者就業措施,令長者活得有尊嚴。黃婆婆提交立法會的意見書全文轉載如下。相關報道

主席你好,我叫黃月嫻,今年 67 歲,係一位拾荒者,同時都有參與拾平台為拾荒者爭取權益嘅工作。

我想從自己嘅遭遇嚟話俾啲政府聽,長者出嚟搵嘢做有幾困難,我哋老人家面對貧窮有時係好被動同埋無奈,社會支唔支持長者係好重要嘅。

廣告

我係一位已退休嘅低級公務員,每月攞得三千蚊嘅退休金同攞綜援係差唔多,一個人住喺公屋,交咗租同埋其他生活雜費之後,剩番嘅根本係要好慳好慳先至可以生存倒,而家喺香港生活水平咁高,如果我哋唔出嚟做嘢,根本係好難喺呢到生活。

喺幾年前開始,我已經開始嘗試搵嘢做,我唔係唔想搵亦唔係唔想做,只係個社會對待我哋唔係咁友善,你哋又話鼓勵長者就業,咁究竟做咗啲咩幫倒我哋呢?我試過搵好多份工都食白果呀!

廣告

(1) 我試過打電話想去見兩份診所清潔嘅工,都冇咗音訊。

(2) 又去過見鐘點工人,份工又要湊放學又要送飯要煮飯,但個工資係好低好平好剝削擺明係恰我哋老人家睇唔起我哋。

(3) 見過快餐店做侍應,嗰一次我仲記得同另外一個後生啲嘅女人應徵,我都想問個經理叫佢俾份表我填,問佢可唔可以請我,跟住佢攞咗份表嚟俾咗嗰個女仔,對住我就一笑置之,唔理我行咗去,我喺到諗駛唔駛咁呀!唔通我真係咁唔適合做嘢咩?跟住我朋友同我講:「唔通佢會話俾你聽佢哋有年齡歧視咩!」

好多工都只係等電話冇回覆嘅,若果考咗個保安牌就真係會請我咩?有啲老人家好似我哋咁本身又有長期病患嘅,身型又矮可能有啲仲有少少陀背嘅,其實啲僱主係會有選擇㗎唔係咁易請。好啦政府又話有啲做社會服務嘅工作但係開嘅位都唔夠我哋去做啦,就算有培訓咁又點呢?始終太多基層嘅長者啦,根本職位都唔夠供應。
 
我想建議政府不如諗下好好規劃長者就業嘅措施啦,俾多啲唔同工種嘅選擇我哋,同啲僱主講清楚唔好年齡歧視,就算係粗重工作,都試下幫我哋改善下工作環境,友善啲安全啲,可以令一班長者有尊嚴去做嘢。

而家我哋剩係來來去去都只係可以做洗碗呀,清潔工呀執紙皮呀呢啲工,一個老人家去做好辛苦㗎,我哋根本冇得選擇呀,呀局長你試下做下呀又唔見你哋去做,點解剩係要啲基層長者去做呢?

我哋可唔可以有更多嘅選擇呢?又或者你想減低長者貧窮率,除咗係叫我哋做嘢,又可唔可以喺社會福利方面去諗呢?例如社區支援,整體嘅醫療系統支援,全民退休保障係所有長者嘅權利,有基本嘅生活工資,收入好啲等等。

我哋喺香港做咗嘢四五十年,已經好攰,可唔可以令我哋過得有尊嚴,舒適啲嘅晚年生活俾我哋呢班老人家呢?

發表意見