立場新聞 Stand News

70s 世代 - 被遺忘的一代

2016/4/18 — 21:37

唔記得響邊度聽過一個講法,話70s世代係被遺忘嘅一代。

呢代人係戰後嬰兒潮嘅下一代,被教得比較聽話,一來因為佢地嘅戰後嬰兒父母本來就好聽話,二來佢地細個係俾港英政府教出嚟,所以佢地好多人到而家仲係用緊英治時期嘅眼光睇社會問題。

70s世代通常只有一個兄弟姊妹,因為佢地係家計會宣傳下嘅一代(1975年「兩個夠晒數」宣傳出現前,已經有好多節育宣傳),兄弟姊妹少咗,受教育多咗,更識玩考試遊戲規則,佢地本來以為學歷比上一代好嘅自己,會承襲80-90年代香港「盛世」,結果就係佢地一出身就係「建華盛世」。70頭嘅人可能好少少,佢地97前出身仲搭到經濟泡沫尾班車(但好多人因為咁買咗樓變負資產十幾年),70中後期嘅人就一畢業就經濟不景,近排大家講《Long Vacation》 20週年裡面合約工嘅一代,其實呢代人好有感受。佢地捱下捱下,轉眼間已經過咗仲會忿怒嘅階段,然後社會開始有抗爭出現,帶頭嘅多數已經係「80後」。70世代彷彿從未出現過似的。

廣告

最後,70世代年華老去,三十幾到四十幾歲,成屋人要照顧,近呢十年經濟好番啲,佢地由97到而家捱咗咁多年,總算餓唔死,有部份人響個社會總算露出頭角(Viu TV台長同沈教授係中學同屆同學,大約三十七八歲;朱凱迪未到40 — 不過佢真係唔會餓死,因為佢過嘅生活簡樸到等於我地半個人),但總體而言,都係比較少人談論嘅一代。當80後都開始被90後話out嘅時候,而呢個社會話事嘅人,大部份二三十年前已經開始話緊事嘅戰後嬰兒,70後更加彷彿冇存在過一樣。

(延伸題材:當識玩考試上流遊戲規則嘅聽話70s世代變成父母嘅時候,佢地就係而家嘅中小學生家長...)

廣告

 

原刊於作者 fb

發表意見