立場新聞 Stand News

Always Fighting

2018/9/27 — 21:00

圖片來源:作者 Facebook

圖片來源:作者 Facebook

之前應承咗一個訪問,雖然噚日發生咗好大件事,但始終之前約咗記者朋友,趁今朝尚有空檔就快手手應約。記者問我去到依家有無擔心過自己的出路,我即刻大笑咗好耐,因為諗一諗,真係未諗去向,因為我哋兄弟姊妹面前仲有一場仗未打完。

記得當年,我哋爭取到退休年齡延至 65 歲,當時真係開心到爆炸,因為可以同大家同事一齊享受自己爭取返嚟嘅成功果實,無諗到有一日大家竟然會面對咁不人道嘅對待。不過,就係要遇到呢啲事你先會知道,即使我哋遇唔到一個好嘅老闆,但起碼我哋可以擁有一班好同事,去到呢啲關頭,你就會知邊個係真正嘅朋友,就算可能平時「斯斯縮縮」都好,但係走到抗爭最前線,大家就係最堅實嘅戰友。

英國同事其實覺得我係一個癲婆,以前搞復職、搞歧視職工會案,搞到以前律師都怕咗我,因為明明條例係寫咗無得復職,但我都會去試,爭取談判,到最後我真係復職呀!我一路都相信,最重要唔係成唔成功,係起碼我哋去試。人哋話點解我成日都贏,其實,只係我輸嘅時候大家睇唔到。

廣告

想贏?知唔知有咩秘訣吖?就係要識輸囉。

我哋無做錯到任何嘢,今次僱主越係想快刀斬亂麻,我哋就會越硬淨咁去反抗,我哋每個同事都會係咁。因為我哋英航工會成班同事,係 Always Fight Mode!!

廣告

 

#繼續對數 #啲數計到唔清唔楚 #搞錯

原刊於作者 Facebook

發表意見