立場新聞 Stand News

CCTVB最興抄對家節目 ViuTV要不斷創新 打低大台霸權

2016/4/29 — 21:21

《跟住矛盾去旅行》片段截圖

《跟住矛盾去旅行》片段截圖

Viutv的真人騷《跟住矛盾去旅行》似乎都幾多人睇,口碑則好壞參半。不過點都算係一個成功的開始,始終新電視台最緊要有noise,有話題先有人睇。不過好老實講,我對Viutv之後的發展唔算太樂觀。

根據CCTVB的往績,佢地最興就係抄對家的節目,再加以改良。好似當年亞視做《今日睇真D》,無線就整個《城市追擊》;亞視引入《百萬富翁》,無線就搵DO姐主持《一筆OUT消》一樣。無線勝在夠無恥,而且好老實講,佢地資源始終比較多,明星又多D,加上香港觀眾非常犯賤,所以只要TVB肯抄對家,好容易搶返D觀眾返來。

以真人騷為例,《跟住矛盾去旅行》的概念其實唔錯,但亦好易複製。無線如果搵岑應呢類專拍真人騷既監製去拍同類節目,以佢拍《求愛大作戰》、《盛女愛作戰》的經驗,唔難拍出比《跟住矛盾去旅行》更有張力的真人騷。而好老實講,《跟住矛盾去旅行》仍然係比較稚嫩,拍得略嫌拖沓,可能係經驗不足所致。

廣告

所以Viutv如果想再下一城,就絕對唔能夠掉以輕心。唔好以為繼續開拍《跟住矛盾去旅行》第二、三、四輯就夠,觀眾好快睇厭,而係要不斷創新。響呢個網絡年代,唔理你咩節目,頂多只能維持到個幾星期熱潮。加上套韓劇《太陽的後裔》就快播完,呢類大熱韓劇唔係時時有,虛火一過,先係見真章的時候。

利申:八號仔電盈小股東,你地要做得好好睇睇,打低大台霸權呀。

廣告

 

(標題為編輯所擬)

發表意見