立場新聞 Stand News

Come on James 他媽說

2017/10/26 — 11:43

資料圖片,圖片來源:政府圖片

資料圖片,圖片來源:政府圖片

【文:翁明詩 @全民教育局 HKEd4All】

當年個仔19歲,我從來無見過佢咁嬲;或者正確啲講,係好忟憎。

廣告

我估到佢同女朋友分手了。旁敲側擊,原來是女朋友覺得佢冇前途。

記得James細個時,面仔紅卜卜,活潑好動,一落街就跑跑笑笑,無煩惱的年紀真好。到了報幼稚園的時候,也是邊間近就報邊間,讓他每天開開心心,根本沒有期望他要學到甚麼;會寫自己個名、會讀A-Z、知道甚麼Fireman, Policeman,就很好了。不像現在的父母,又要學高深英文、又要2歲學鋼琴(手指都未發育好)、又要N班幼稚園小學中學一條龍;古代考狀元都只是寒窗苦讀十年,香港小朋友由2歲到22歲,讀足二十年,無讀到癡線,其實已經是狀元級數。

廣告

我是一個好媽媽,我不望子成龍,只求他健康快樂,我不會讓James有讀書壓力。至少我是這樣相信的。

James準備升小學的那年,我原本想幫他報附近的小學,校風不錯,接他放學也方便。但是鄰居陳太說了一句:「呢間小學升中派得唔好喎,派Band 4 Band 5都有!」我馬上找了第二間風評比較好的,可惜James每日要早一個鐘起身搭車返學,冬天起身仲辛苦,我明白。我不望子成龍,只是想他升到讀好小學,打好基礎。

升上小學後,James都算聰明,成績一直是中上。直到學能測驗的前一年,學校不停操練,話如果整體學生成績好,學校能夠派往Band 1中學的名額就越多。那一年,我買的推理練習堆滿成間屋,James除了食飯瞓覺沖涼,其餘時間都在做推理。我見其他家長都係咁樣。我仲請了補習老師,週末就幫James溫故知新。我不望子成龍,只是想他升到好中學。

結果,James派到一間不錯的Band 1中學。但讀了一年,政府就強逼大多數英中轉做中中,James學校都要。這豈不是降Grade?! 英中越來越矜貴,一位難求,更莫講要轉校過去。唯有期望他考好會考。所以我從中三開始已經叫James試做Past Paper,研究過去20年的出題趨勢;什麼雞精班、貼題書,我都為他準備好。我不望子成龍,只是想他跳到更好的中學。

終於,我和James的努力沒有白費,James會考有25分,「如願」轉了英中讀中六。但他開始沉迷打機,近視越來越深,鬧過好多次都不聽;又認識了一個女同學拍拖,我話:「中學生不應談戀愛,你冇聽過咩?作文都寫唔少啦!」升中七的那年暑假,他說女友想去旅行,我話不如留在家溫書,考完高考再去啦。他說不去就會分手的了(這究竟是甚麼女朋友?)。我之後每日催促他溫書,的確,James都算勤力,壓力大到滿面暗瘡。我不望子成龍,只是想他升到好大學。

結果,他連大學水泡科的門檻都達不到,我好失望。唯有去讀政府新推的副學士,說將來可以銜接上學位。我勸他不如repeat一年再考,還是傳統學位比較韾香啊;他卻堅持要和女友一起讀大學。豈料,他女友入了港大不夠一個學期,就甩了James。我說我有先見之明,他卻抱怨我落井下石,由細到大都迫佢讀書,女朋友是港女,阿媽是港媽。

我是港媽?我不是,我不望子成龍,我只是為了James好。

發表意見