立場新聞 Stand News

No Cantonese!— 舌尖廿三條 有片有真相

2016/7/11 — 14:04

《東張西望》片段截圖

《東張西望》片段截圖

某電視節目,本地 Hip Hop and Rap 組合「農夫」成員陸永體驗小學生活,校方開宗明義話過佢知:「我哋有個校規呢,就係啲學生一定要講英文同埋普通話嘅。小息都要㗎,小息一定要㗎。」陸永喺教室唔小心講咗一句廣東話,隔籬同學亦自動自覺提醒佢:「No Cantonese!」《舌尖廿三條》,有片有真相;就算啲「普教中」學校夾錢請資深大律師清洪上庭質疑片段真偽,睇怕都打唔甩。片段如下:

身為「教育工作者」,豈可上電視推銷自己就祭出「以普通話教授中文科」、《舌尖廿三條》作招徠;激起公憤,記者查詢佢哋有冇禁止小朋友講粵語,就大玩特玩語言偽術,詭辯「唔存在強唔強迫學生講普通話嘅問題」?係呀,啲風紀隊長冇搵枝槍指住同學個頭,唔准佢哋講廣東話㗎,梗係「唔存在強迫」啦;李波就「自願」坐洗頭艇去大陸協助調查嘅,梁振英冇向「因航」地勤人員施壓㖭。

廣告

「語言呢就好重要嘅,語言嘅質素呢,特別係細路仔呢,我哋三歲開始教導佢啦,至佢十一歲畢業。普通話老師有三十四個,西人老師有二十八個;除咗我哋嘅教師之外呢,我哋嘅文職人員啦、清潔同工啦,佢哋都會選英語或者普通話。」哦,原來語言質素,都有高低之分;普通話就「高端」,要「三歲開始教導」;廣東話就劣質,「清潔同工」都唔吼。呢套赤裸裸嘅「教育」理念,唔知各位市民同藝人黃翠如、傅穎點諗啦;筆者聽見,就「嚇到成個人打冷震」囉。結尾,校長問陸永:「No Cantonese from now on, ok?」何嘗唔係問緊全港七百萬市民、某臺十幾點觀眾?

廣告

‪#‎舌尖廿三條‬
‪#‎市區全面禁粵‬
‪#‎校園全面禁粵‬
‪#‎普教中‬
‪#‎校本自決‬

港語學 facebook

發表意見