立場新聞 Stand News

Plan! Plan! Plan! 邊個話你一定有命?!

2017/10/29 — 14:44

資料圖片

資料圖片

【文:阿臣 @全民教育局 HKEd4All】

由兩個星期前的JUPAS嘅文字,到上星期的Come On James系列,其實都顯得出我哋香港嘅教育制度,只係著重人嘅「成就」。而呢一啲「成就」,都只一啲身外物,例如成績、學歷、工作、收入、社會地位等。

阿臣有啲不齒昃Sir嘅玩法,因為昃Sir著重嘅,只係學生入唔入到大學;但同時間,昃Sir嘅做法又俾咗少少啟示阿臣,就係唔識玩的話,今天嘅教育制度絕對有能力「玩死」學生,埋沒學生特能力、興趣、發展機會。

廣告

諗深一層,今日嘅學校、教育制度有幾當學生係一個人?功課、學習進度要求一式一樣、為學生搵「學習機會」、鬥整靚張CV或者portfolio,但係十幾歲,甚至幾歲人仔,其實有幾多嘢好寫?大家真係唔覺得變態㗎咩?

個人自理能力唔教、情緒控制唔教、面對逆境嘅能力唔教、了解自己及自省能力唔教、連同人建立關係都唔教,一個人又可以點樣做返好一個人呢?教好多知識,最多咪只係一個有學識嘅人,但呢啲知識未必教到一個人點樣過一個難關。唔好講話有人會因為面對唔同嘅情緒問題,淨係一個人第二日會否必然醒返我哋都唔知,點解唔係教活在當下、點解唔係教學習尊重別人、點解又唔係教學習欣賞自己?

廣告

我哋前線嘅老師好多都好有心,將學生嘅成長需要放返響第一位。我哋只係懇求教育當局,都承認返學生係人、老師係人、家長係人,並響諗改革制度嘅同時,都留返更多嘅空間俾每一個持份者,並讓學生能學懂熱愛生命。

發表意見